Powěsće: wutoru, 31.07.2018


Hornja Łužica: žně zakónčene

W Hornjej Łužicy su žně žita nimale zakónčene. Tak je Sorabija agrarna AG sobotu hižo dožnjała. Budissa agrar AG pak je wčera swoje poslednje polo wotžnjała. Za najwjace zawodow běchu to najzaše žně, kiž su hdy měli. Normalnje so žně hakle srjedź awgusta zakónča. Suchota je so wšudźe wuskutkowała, ale z regionalnymi rozdźělemi. Na přikład je ratar Jan Wjesela z Chrósćic mjez 20 a 50 % mjenje nažnjał. Najwjetše straty měješe z rěpikom. Za Wjeselu su straty w Njeswačidle a Zejicach hišće znjesliwe, w Pěskecach, Dobrošicach a Jitku pak njespokojace. Chce pruwować, hač móže stat pjenježnu podpěru dać. - Sorabija agrarna AG pak bilancuje, zo za nju žně žana katastrofa njeběchu, a zo leži wunošk w přerězku zašłych lět. Pod přerězkom ležeše předewšěm triticala a trochu tež ječmjeń.


Kamjenc: zhromadny muzejowy projekt z Pólskej

"Wědomosć je dyrdomdej" - pod tutym hesłom startuje Muzej Zapadneje Łužicy w Kamjencu zhromadnje z pólskimi partnerami tři lěta trajacy projekt, kotryž Europska unija podpěruje. Zaměr je, zo přewjedu šule wěste wučbne hodźiny tež w muzejach. Potrjechi to na přikład matematiku, informatiku, přirodne wědomosće a biologiju. Partneraj Kamjenskeho muzeja stej muzejej w pólskim Zgorzelecu a muzej keramiki w Bolesławiecu. Za to dóstanu tute tři muzeje wot Europskeje unije nimale jedyn milion eurow.


Wulke Ždźary: droha zaso wotewrjena

B 96 pola Wulkich Ždźarow bu wčera po štyrjoch měsacach twarskeho časa zaso wotewrjena - dwě njedźeli prjedy hač bě planowane. Drohu južnje Hórnikečanskeho jězora su saněrowali, dokelž měješe masiwne škody. Dźěše tohorunja wo wěstotu: stare hórnistwowe nasypy wupřestrěchu so zdźěla pod drohu a dyrbjachu so zhusćić, zo njeby so jězdnja sypnyła. Cyłkowny projekt płaćeše 1,2 milionaj eurow. Zapłaćeny bu wot Zwjazka a zdźěla wot hórnistwoweho saněrowarja LMBV.


Suchota a rěki: niłki staw wody

Tež hdyž wjedźe Sprjewja w Budyšinje hišće dosć wody, je wjetšina druhich rěkow a rěčkow we Łužicy hač k połojcy swojeho stawa pozhubiła. Tak tež w Chrósćicach. Hišće njeje principielnje zakazane, wodu ze Satkule za krjepjenje brać - za klumpanje pak je trěbna dowolnosć krajnoradneho zarjada. Čěranje wody z ruku je dowolene. Wokrjes Budyšin pak naležnje prosy , tuchwilu žanu wodu z niłkich rěkow klumpać. Jeli suchota dale traje, móhło so samo čěranje wody z ruku zakazać.


Literatura: Proza a basnje Jana Skale wušli

W Ludowym nakładnistwje Domowina je wušoł wuběr prozy a basnjow Jana Skale pod titulom "Stary Šymko" jako kapsna kniha . Wudaće za šulsku potrjebu wobsahuje prozu a basnje, kotrež wotbłyšćuja jeho lubosć k domiznje a bój wo zdźerženje eksistency Serbow. W titulnym powědančku „Stary Šymko" rysuje Jan Skala tragiski wosud bura, kiž so wobara statok a pódu na briketownju „Erika" předać.


Kamjenc: Kubłanskej towaršnosći zawrěja dom

Wokrjes Budyšin dźensa dźěle domu Kubłanskeje towaršnosće (KaBi) w Kamjencu zawrěje. Přičina su wobšěrne twarske njedostatki a energetiski hubjeny staw domu. Towaršnosć móže zdźěla w pódlanskim twarje kaž dotal dale skutkować, na přikład kuchnju za šulsku jědź wjesć. Porno tomu so wuwučowanski hotel KaBi začini a wustajenišćo socialneje mebloweje kupnicy přepołoža do zarjadniskeho centruma na Garnizonowym naměsće pódla Fair-kauf-centruma.


Serbski sejm: termin zapodaća kandidatow podlěšeny

Rada starostow je wobzamknyła podlěšenje časa za zapodaće wólbnych namjetow za kandidatow za Serbski sejm. Nowy zakónčacy dźeń je 10. september město dotal 13.awgust. Kónc wólbneho časa wostanje bjez změny spočatk nowembra. Wo podlěšenje běchu wjacore zjednoćenstwa prosyli, mjez druhim dla prózdninow w Braniborskej a Sakskej, rjekny wólbny wjednik Dr. Hagen Domaška.

posledni raz aktualizowane: 31. pražnika 2018, 08:47 hodź.