Powěsće: srjedu, 01.08.2018


Budyšin: Nowa intendantka nastupi

Wot dźensnišeho nastupi Judith Kubicec zastojnstwo intendantki Serbskeho ludoweho ansambla. Rodźena Budyšanka nawjeduje ansambl zhromadnje z překupskej jednaćelku, Dianu Wagnerec. Po swojim studiju we Weimarje, Parisu a Londonje je Judith Kubicec jako dirigentka w tu- a wukraju skutkowała. Wuměłski nawod ansambla bě wot 2015 wakantny. Nětko chce so Judit Kubicec z orchestrom, chórom a baletom bóle na jednotliwe twórby koncentrować a tak wyšu kwalitu docpěć.


Hornja Łužica: Bjezdźěłnosć zlochka stupała

W Hornjej Łužicy je aktualnje 18.990 ludźi bjezdźěłne. To je po informacijach dźěłoweje agentury Budyšin 159 Hornjołužičanow wjace hač měsac do toho. Z tym leži kwota bjezdźěłnosće pola 6,7 procentow. Přičina za lochke powyšenje je, zo so młodźi ludźo nachwilnje jako bjezdźěłni přizjewja, kotřiž su runje swoje wukubłanje zakónčili a hišće žane dźěłowe městno namakali njejsu.


Worklecy: Nachwilne rjadowanja za hortowe dźěći

Hort Worklečanskeje šule zarjaduje so za wšě dźěći druheho, třećeho a štwórteho lětnika z nowym šulskim lětom we Worklečanskej šuli. Dokelž rum we šuli njedosaha, budźe pak hort za šulerjow prěnjeho lětnika z Njebjelčic w Njebjelčanskej pěstowarni. To zdźěli Worklečanski wjesnjanosta Franc Brusk. Přemysluja wo tym, za přemosćenje pobrachowacych rumnosćow tež kontejnery pódla Worklečan šule nastajić, pak za skupinsku wučbu abo za hort. Hakle njedawno su Worklecy dóstali spěchowanske připrajenje za nowotwar horta ze 120 městnami.


Budyšin: 10 lět wokrjesna reforma

Dźensa na 1. awgusće je 10. róčnica wokrjesneje reformy w Sakskej. Přez hromadupołoženje z Kamjenskim wokrjesom a bjezwokrjesnym městom Wojerecy bu Budyski wokrjes po płoninje najwjetši w Sakskej. Je 2 390 kwadratnych kilometrow wulki. Wjetšina hornjołužiskich Serbow bydli z toho časa w Budyskim wokrjesu, Slepjanska kónčina słuša do Zhorjelskeho wokrjesa. Wokrjes Budyšin swjeći jubilej cyłe lěto z najwšelakorišimi zarjadowanjemi. Wjeršk bě srjedź junija Klóšterski a swójbny swjedźeń w Pančicach-Kukowje.


Bliski zjawny wobchad: wyše płaćizny

We wobchadnym zwjazku Hornje Łobjo (VVO) stupaja płaćizny wot dźensnišeho wo přerěznje 2,1 procent. Za to wostanu znajmjeńša dwě lěće stabilne, rěka ze stron zwjazka. Nimo toho móža so na měsačne karty, abo-karty a jobowe lisćiki wjace wosobow darmotnje sobu wzać hač dotal. Na tute lisćiki smě jich wobsedźer tež wotydźenja po 18 hodźinach dalšeho dorosćeneho abo štyrjoch šulerjow sobu wzać. Dotal płaćeše to jenož za kónc tydźenja a swjate dny. K teritorijej VVO słuša wobkruh Drježdźan, tak tež kónčiny wokoło Wojerec, Kulowa, Kamjenca a Połčnicy


Kozarcy: Horce škotowanje

Wčerawši škot serbskich seniorow w Kozarcach je Siegfried Rauwa z Chróstawy pola Wulkeje Dubrawy dobył. Druhi bu Křesćan Weclich z Nuknicy´, a třeći Pawoł Šołta ze Šunowa. Cyłkownje bě 27 hrajerjow při drje najwjetšej ćopłoće, kotruž su dotal w 24 lětach při škotowanju dožiwili.

posledni raz aktualizowane: 01. žnjenca 2018, 12:33 hodź.