Powěsće: pjatk, 03.08.2018


Z rostlinami kružny wobchad pyšić

Město Budyšin je plany za wuměłski projekt w kružnym wobchadźe při Schliebenowej cofnył. Poprawom chcychu za to wubědźowanje wupisać a wobydlerjo mějachu sobu rozsudźić. Hospodarskeho połoženja dla pak dyrbjachu budget za to hižo wjacekróć přikrótšić. Zhromadnje z měšćanskimi radźićelemi je zarjadnistwo nětko rozsudźiło, projekt najprjedy raz njezwoprawdźić. Chcedźa kružny wobchad nětko z rostlinami wobsadźeć.


Z lětadłom nad Budyšinom

Na Budyskim lětanišću w Lětonju zahaja so dźensa připołdnju 15. Budyske lětanske dny. Po informacijach organizatorow je to najwjetša tajka pokazka w Sakskej. Hač do njedźele so historiske lětadła kaž tež wuměłske lětanje a modelowe lětadła pokazuja. Mjez druhim wočakuja tež němskeho mištra we wuměłskim lětanju. Wopytowarjo móža so na kołolěty po Hornjej Łužicy podać.


Z busom na Boršć do Kamjenca

Za čas lětušeje Boršće w Kamjencu kónc měsaca změni so poskitk dojězdźowaceho busa - tak mjenowaneho Shuttle-busa. Wobchadowy zwjazk Hornje Łobjo přiměri jězbne časy planej železniskeho zwiska Drježdźany-Kamjenc. Tak dóstanu so přijěducy wopytowarjo lóšo k swjedźenišću a zaso wróćo k dwórnišću.


Z kolesom wot Běłeje Wody do Trjebina

Po kolesowarskej šćežce podłu wokrjesneje dróhi wot Běłeje Wody do Trjebina móže so nětko zaso kolesować. To zdźěli krajnoradny zarjad w Zhorjelcu. W zašłymaj měsacomaj bu 3,5 kilometrow dołhi pućik ponowjeny. Při tym wobnowichu asfalt a wupołožichu foliju, kotraž ma puć před korjenjemi škitać. Přichodny tydźeń chcedźa hišće šćežku markěrować. 305.000 eurow drohe ponowjenje stej wokrjes a kraj Sakska zapłaćiłoj.


Ze serbskimi mjenami na karće

Wotnětka su serbske pomjenowanja městow a wsow Delnjeje Łužicy tež w kartach geo-słužbow Braniborskeje zapisane. Wobmjezowane su mjena w dwěmaj rěčomaj pak na sydlenski rum Serbow w kraju. Tutón wobsahuje tučasnje 43 městow a gmejnow. Karty su w syći pod zapřijećom ,,Brandenburgviewer" zestajene a słuža wosebje zjawnym zarjadam, su pak za wšěch přistupne.

posledni raz aktualizowane: 03. žnjenca 2018, 07:46 hodź.