Powěsće: póndźelu, 06.08.2018


Tójšto lěsnych wohenjow

W lěsach w sewjernym dźělu Budyskeho wokrjesa je so wot měrca hižo něhdźe 30 króć paliło. To je nětko hižo nimale dwójce telko lěsnych wohenjow kaž loni w cyłym lěće, zdźěli zarjad za lěsnistwo. Na wjace hač 40 dnjach mějachu w lěsach wokoło Wojerec lětsa hižo schodźenk 4 abo 5 stracha lěsnych wohenjow. Zarjady z awtomatizowanymi kamerami lěsy wobkedźbuja. Nimo toho su tuchwilu štyri stražne wěže w Budyskim wokrjesu wodnjo z wobkedźbowarjemi wobsadźene.


Łužiske hudźbne lěćo nimo

Festiwal "Łužiske hudźbne lěćo" zakónči so wčera w Budyšinje tradicionelnje z koncertowanjom dujerjow z radnicoweje wěže a na Hłownym torhošću. Na 15 koncertach naličichu něhdźe 2900 wopytowarjow. Jedyn z wjerškow swjedźenjowanja wotmě so pjatk w klóšterskej cyrkwi w Pančicach-Kukowje. Projektowy chór kaž tež Serbski komorny orchester z Budyšina pod nawodom cyrkwinskeho hudźbneho direktora Friedemanna Böhmy tam zahudźištaj. Solistisce skutkowaštaj sobu z Budyšina pochadźaca a w Drježdźanach skutkowaca sopranistka Romy Petrick a serbski organist Feliks Brojer.


Kurs čěšćiny w Chrósćicach

W Chrósćicach zahaji so dźensa tydźenski intensiwny kurs čěšćiny za dorosćenych, kiž poskićuje Rěčny centrum Witaj. Hač do pjatka změja wobdźělnicy kóžde popołdnjo wučbu z Čechom Janom Breindlom. Nimo toho su planowane přednoški wo čěskej kulturje, stawiznach a politice kaž tež wulět do Libereca.


Wustajeńca Serbskeho muzeja nětko w Gubinje

Pućowaca wustajeńca Budyskeho Serbskeho muzeja "Serbske cyrkwje mjez Lubijom a Luborazom" je z Gródka dale pućowała a je wot wčerawšeho w Gubinje widźeć. W tamnišej klóšterskej cykwi budźe hač do kónca awgusta a po tym w Baršću. Serbski muzej bě wustajeńcu zhromadnje z fotografom Jürgenom Maćijom składnostnje jubileja reformacije wuwiło. Wona informuje wo wuskutkach reformacije na cyrkwinske žiwjenje we Łužicy a wo wužiwanju serbskeje rěče w cyrkwjach.


Ahlhornscy seniorojo su mištrojo w pjasćobulu

W kónctydźenskich němskich mišterstwach pjasćobula za nad 60-lětnych w Kubšicach zdobychu sebi wčera mužojo AK 60 Ahlhornskeho sportoweho towarstwa titul němskeho mištra. Po dramatiskim finalu přećiwo SEV Rosenheimej so sportowcy z Nižosakskeje zbožownje přesadźichu. Wo třeće městno wojowaštej Kubšičenjo a mustwo TSV Stelle - tohorunja z Nižosakskeje, hdźež pak Łužiscy zastupjerjo podležachu. Pjasćobul ma w Kubšicach dołhu tradiciju, młodostni towarstwa su hižo wospjet němske mišterstwa dobyli.

posledni raz aktualizowane: 06. žnjenca 2018, 08:59 hodź.