Powěsće: wutoru, 04.09.2018


Dalša zběrka Róžeńčanskeho kružka pisacych wušła

Dalša zběrka Róžeńčanskeho kružka pisacych je w Ludowym nakładnistwje Domowina wušła - a to pod titulom „Zornjatka na puću". Wubrał a zestajił je teksty nawoda kružka Beno Budar. W swojich basnjach, powědančkach a spěwach wěnuja so ludowi awtorojo na žortne kaž tež chutne wašnje zjawam dźensnišeho časa. W nowej zběrce su wšitcy z tekstami zastupjeni, w njej su tež basnje njeboh Marje Krawcec. Róžeńčanski kružk pisacych skutkuje hižo 55 lět.


Slěbro za zawodnu radu Maja-zawoda w Kulowje

Druhe městno sakskeho myta za sobupostajowanje je dóstała wčera w Budyšinje spožčena zawodna rada mebloweje fabriki Maja z Kulowa. Wona je so najebać zatrašenja přez wjednistwo załožiła. To samsne płaći za prěnje městno, za firmu Accuma ze Zhorjelca. Němski zwjazk dźěłarnistwow DGB mytuje z tym angažowane dźěło personalnych abo zawodnych radow za swojich sobudźěłaćerjow. Sakski ministerski prezident Kretschmer je swjedźensku narěč dźeržał.


Wuběrne lěćo za kupjele

Hornjołužiske kupjele buchu lětsa dźakowano horcemu a suchemu lěću jara derje wopytane. Tak su w Biskopicach něhdźe 34.000 hosći witali, štož je nowy rekord. Hewak maja tam stajnje wo třećinu mjenje kupacych. Pjatk su w Biskopicach sezonu zakónčili a z tym tež 90-lětny jubilej kupjele. Tež Porchowsku kupjel je lětsa telko hosći wopytało kaž hišće ženje, mjenujcy wjace hač 45.000.


Ideje za polěpšenje žiwjenskeje kwality pytane

Hač do 22. nowembra maja gmejny, towarstwa, zawody a priwatnicy hišće chwile, zo bychu swoje projekty za wubědźowanje "Ideje za žiwjenje na wsy" zapodali. Zamołwite Sakske ministerstwo za wobswět a ratarstwo je wčera w Kamjencu wo wuměnjenjach informowało. Pytaja so njewšědne ideje, kotrež pomhaja žiwjensku kwalitu na wsach polěpšić. Projekty towarstwow, zawodow a priwatnikow spěchuja so z mytami hač do 20.000 eurow. Gmejny móža samo hač do poł miliona eurow za zwoprawdźenje idejow dóstać.


Tysacy běharjow w Budyšinje a Wojerecach

Za jubilejny 25. Budyski měšćanski běh je so dotal wjace hač 1000 běharkow a běharjow přizjewiło a za 12. HOYWOJ-cityjowe běhi přez 1700. Za wobě wubědźowani, kotrejž přewjedźetej so wobě tutu sobotu, pak su přizjewjenja hišće móžne. Wosebje wjele šulerkow a šulerjow startuje w Budyšinje tradicionelnje za Serbsku zakładnu a Serbsku wyšu šulu Budyšin a we Wojerecach za Wyšu šulu "Korla Awgust Kocor" Kulow. Mjez pomocnikami w Budyšinje budu zaso zastupjerjo Serbskeho Sokoła. Woni přewozmu rjadowanje wokoło Serbskeho domu a sćoplenje dźěći.

posledni raz aktualizowane: 04. požnjenca 2018, 08:28 hodź.