Powěsće: srjedu, 05.09.2018


Što mysliće wo Domowinje?

Domowina chce z naprašnikom zwěsćić, kak Serbja na nju zhladuja. Wo tym informowaše wona wčera w Budyšinje. Za to ma so naprašnik wućišćany a digitalnje na wšitkich čłonow serbskich towarstwow w Hornjej a Delnjej Łužicy rozesłać. Tež towarstwa zwonka třěšneho zwjazka jón dóstanu. Hač do srjedź oktobra so anonymne naprašowanje přewjedźe, kotrež so wot agentury wuhódnoći.


Dwě serbskej prapremjerje

Z nowej hrajnej dobu zhladuje Němsko-Serbske ludowe dźiwadło na 70. róčnicu załoženja němskeho a serbskeho dźiwadła w Budyšinje. Madleńka Šołćic, zastupjerka intendanta za serbske dźiwadło připowědźi wjacore serbske premjery. Jedna so při tym wo klankodźiwadłowu hru "Kito Husličkar" a činohru "Wopušćeny dom". Dalšej premjerje budźetej "Mały Muk" wot serbskeho dźěćaceho dźiwadła a keklija "Sergej" wot Jurja Kocha.


Tež Łužica je moderna

Přirunujo z cyłej Němskej přiběra podźěl domjacnosćow ze spěšnym internetom w Sakskej najspěšnišo. Po najnowšich ličbach matej tu hižo wjac hač dwě třećinje zwisk z 50 MBit/s abo hišće wjac. Z tym je Sakska mjez wuchodnymi krajemi cyle prědku. Tež we wjacorych dwurěčnych gmejnach, mjez druhim w Radworju, Chrósćicach, Kulowje a Pančicach bu wobydlerjam tele dny darmotny spěšny přistup do interneta poskićeny.


Prastare knihi nětko we Lužicy

Serbska centralna biblioteka w Budyšinje je wjacore historiske knihi dóstała. Darićelka je Ingrid Kalensee z Mannheima, kotraž je wo Krabaće slědźiła. Zběrka wobsteji z antikwariskich spisow. Předewšěm su to knihi wo stawiznach Sakskeje a Wettinskeho knježerstwa kaž tež wo łužiskej tematice. Najstarša kniha je ze 16. lětstotka, dalše pochadźeja z 18. a 19. lětstotka.


W Slepom wšo běži

Twar němsko-serbskeho šulskeho centruma w Slepom pokročuje bjez wjetšich zadźěłkow. To rozprawjachu wčera zastupjerjo twarskich firmow gmejnskej radźe. Tele dny so runje třěcha zakładneje a srjedźneje šule kaž tež sportoweje hale zakryje. Twar šulskeho centruma bu 2008 z energijowym koncernom Vattenfall dojednany a ma so klětu kónc lěta přepodać. W nim so dwurěčne kubłanje po modelu 2plus dale powjedźe. Tuchwilu wobdźěli so wot 179 Slepjanskich šulerjow 161 na serbšćinje.


Wo wučerjach a pěstowarnjach

Na 400 ludźi je wčera wječor w Kamjencu ze sakskim ministerskim prezidentom Kretschmerom a kultusowym ministrom Piwarzom diskutowało. Temy běchu wosebje kubłanje, falowacy wučerjo a pěstowarnje. Wobydler z Delan skoržeše, zo dyrbi Ralbičanska gmejna za swoju nowu pěstowarnju přewjele pjenjez sama připłaćić. Wonka před hotelom "Město Drježdźany" běše wowčer Měrćin Just dwě wowcy wupołožił, kotrejž bě wjelk dźeń do toho zakusał.

posledni raz aktualizowane: 06. požnjenca 2018, 12:24 hodź.