Powěsće: štwórtk, 06.09.2018


Čitanska turneja LND

Ludowe nakładnistwo Domowina je wčera terminy swojeje lětušeje čitanskeje turneje wozjewiło. Wona zahaji so přichodnu póndźelu w Ralbičanskej Serbskej zakładnej šuli a skónči so njedźelu, 30. septembra w Radworju ze 24. Literarnej kermušu. Na turneji čitaja serbscy spisowaćeljo na jědnaće městnach, mjez druhim tež w Drježdźanach, Malešecach a Wojerecach, zo bychu najnowše wudaća serbskeho nakładnistwa předstajili.


750 lět Wojerecy

Z wurjadnym posedźenjom měšćanskeje rady su wčera wječor we Wojerecach zahajili swjedźeń 750. jubileja města. Na tutym posedźenju su zdobom tež 30-lětne partnerstwo z městom Dillingen w Posaarskej a 20-lětne partnerstwo z finskim městom Huittinen hódnoćili. Dźensa wotewri so w Nowym měsće swjedźenišćo, na kotrymž so kulturne programy předstaja. Nimo toho steji tam hižo 33 metrow wysoke koło. Wjace hač 30 wikowarjow a 40 gastronomow chce dźensa swoje předawanišća natwarić. Njedźelu wječor so Wojerowski jubilej z laserowej show a wohnjostrojom zakónči.


Zeppelinowa prjedy dotwarjena

Po Zeppelinowej dróze w Budyšinje pojědu po aktualnym planje awta wo tójšto zašo hač dotal myslene. Kaž Němska železnica wčera zdźěli, je nowy móst za ćahi nimale dotwarjeny, runje tak kaž kolije. Tuchwilu runje medije do zemje kładu. Po tym so dróha dotwari. Klětu w nalěću maja twarske dźěła zakónčene być. Dotal bě planowane, zo hodźi so po Zeppelinowej hakle klětu w nazymje zaso jězdźić.


Žadyn dźiwadłowy pedagoga w Budyšinje

Němsko-Serbske ludowe dźiwadło w Budyšinje dyrbi nowu hrajnu dobu najprjedy jónu bjez serbskeho dźiwadło-pedagogiskeho přewoda započeć. Wotpowědne městno njejsu tež po druhim wupisanju wobsadźić móhli, rjekny zastupjerka intendanta za serbske dźiwadło Madleńka Šołćic. Dźiwadłowy pedagoga přewjeduje zhromadnje ze serbskimi kubłanišćemi dźěłarnički a předstajenja za dźěći z přidatnymi poskitkami wobrubi. W zašłej hrajnej dobje je so tak wo něhdźe 2.000 dźěći starał.


Zrěčenje za přesydlenje hotowe

Zrěčenje, kotrež rjaduje přesydlenje Miłoraza wuhloweje jamy dla do sewjerneho Slepoho, je dosformulowane. Gmejnje Trjebin a Slepo kaž tež energijowy koncern LEAG běchu wot apryla wo nim intensiwnje jednali. Kónc oktobra ma so tute zrěčenje w gmejnskej radźe wobzamknyć. Wone wobhladuje so jako wažny měznik při přesydlenju Miłoraza. Spočatnje hišće wot wotbagrowanja wohroženym dźělam južneho Slepoho, Trjebinka, Rowneho a Mulkec pak mjeztym hižo žane přesydlenje njehrozy.

posledni raz aktualizowane: 06. požnjenca 2018, 08:47 hodź.