Powěsće: póndźelu, 10.09.2018


Hornja Łužica: Dźeń wotewrjeneho pomnika

Hornjołužičenjo zajimuja so za swoje pomniki. Tohodla bě wčera wjele ludźi składnosć wužiło, sej tudyše pomniki wobhladać, mjez druhim Budyske jastwo, hrodaj w Koporcach a Ketlicach a staru kowarnju w Hornjej Hórce. Hižo dopołdnja steješe dołha waka ludźi před Budyskim krajnoradnym zarjadom. Tež serbske institucije kaž ansambl, muzej a dźiwadło swoje twarjenja spřistupnichu. Na serbskich wsach bě Radworske dwórnišćo wočinjene kaž tež stary młyn w Swinjarni, hdźež bě jara zajimowany wosebje serbski publikum.


Stróža: Wuspěšne přirodowe wiki

W Stróži pola Hućiny je sobotu nimale 5.000 ludźi na 21. Němsko-serbske přirodowe wiki přichwatało. Wjace hač 80 překupcow a rjemjeslnikow je tam swoje twory poskićało. Někotre su tež na městnje produkty na tradicionelne wašnje zhotowili. Hižo dźeń do toho běchu na serbskim koncerće hudźba na teksty z knihi Jurja Brězana "Moja archa Horni Hajnk" słyšeć. Kaž kóžde lěto je Stróžanske wjesne towarstwo "Radiška" wiki zhromadnje z biosferowym rezerwatom Hornjołužiska hola a haty wuhotowało.


Krabatowe towarstwo: Nowa brošurka wušła

Krabatowe towarstwo je nětko předźěłanu brošurku wo Krabatowej kolesowarskej šćežce wudało. Na wjace hač 30 stronach zbliža zajimcam turistiske poskitki a regionalne wosebitosće podłu kolesowarskeje šćežki a pozadki Krabatoweje powěsće. Nimo toho so 90 kilometrow dołha čara mjez Wojerecami, Kamjencom a Budyšinom čěsce, pólsce, serbsce a němsce wopisuje. Pjenjezy za předźěłanje dóstachu z europskeho LEADER-programa.


Budyšin: Akciski tydźeń přećiwo zabyću

Tutón tydźeń přewjedźe so w Budyšinje druhi akciski tydźeń přećiwo zabyću. Měšćanske towarstwa kaž Budyšin wostanje pisany, Pro Museo a strona Lěwica chcedźa na rozestajenja z ćěkancami w nazymje 2016 a na prawicarske struktury w regionje dopominać. Za to přewjedu kóždy dźeń wuměłske dźěłarnički, instalacije a předstajenja. Přichodnu njedźelu so akciski tydźeń z mjezykulturelnej swačinu pod hołym njebjom zakónči.


Wochozy: Chórowy festiwal w parku błudźenkow

Wjacore dźesatki ludźi su wčera 1. Němsko-serbski chórowy festiwal we Wochožanskim parku błudźenkow wopytali. Nimo Wojerowskeje wokalneje skupiny dožiwichu woni z Błótowskim žónskim chórom z Lubina a serbskim muskim chórom Delany tež serbskej cyłkaj. Mjeztym zo wěnowachu so Lubinske žony narodnej drasće a delnjoserbskim pěsnjam, předstajichu delanscy mužojo hłownje hornjoserbske a słowjanske pěsnje. Z němsko-serbskim chórowym festiwalom prócuje so spěchowanske towarstwo Wochožanskeho parka błudźenkow mjez druhim wo wjac serbskosće w parku.

posledni raz aktualizowane: 10. požnjenca 2018, 08:29 hodź.