Powěsće: sobotu, 08.09.2018


Mjeńšiny pola Zwjazkoweho prezidenta

Na wobydlerskim swjedźenju Zwjazkoweho prezidenta w Berlinje so wot pjatka tež narodne mjeńšiny Němskeje předstaja. Frizojo, Danojo, Sinti a Roma kaž tež Serbja změja zhromadne stejnišćo w parku hrodu Bellevue. Pjatk běchu tam čestnohamtsce angažowani ludźo z cyłeje Němskeje přeprošeni, dźensa je hród za wšěch wotewrjeny. Wčera su so zastupjerjo mjeńšinow w Berlinje nimo toho na posedźenje Mjeńšinoweje rady zetkali.


Dźeń Saksow bjez muskeho chóra Delany

Z dźensnišim wustupom dźěćaceje skupiny Serbskeho ludoweho ansambla "Łužičanka" ma tež program lětušeho Dnja Saksow w Torgauwje serbski podźěl. Dźěći zarejuja popołdnju na jewišću Sakskeho krajneho sejma. Wčera je hižo skupina Madstep z Danielom Matku w Torgauwje wustupiła. Serbski muski chór Delany lětsa po wjele lětach prěni króć na Dźeń Saksow njepojědźe. Delanscy spěwarjo běchu na najwjetšim towarstwowym a ludowym swjedźenju kraja 25 króć pódla.


Nowe hrajkanišćo w Chrósćicach

Při Chróšćanskej šuli je so wčera nowe hrajkanišćo wotewriło. Wjacore nowe nastroje su 11.000 eurow płaćili, zapłaćene buchu wone přewažnje ze spěchowanskimi pjenjezami. Swójski podźěl gmejny je Serbske šulske towarstwo jako nošer Chróšćanskeho horta přewzało. Runočasnje z wotewrjenjom hrajkanišća běchu wčera čaporowe wiki z někotrymi wosebitostkami ze šulskeje łubje.


Veolia dale wotpadki w serbskich gmejnach wotwožuje

Ryćerjec firma z Bóšić wot klětušeho dale wotpadki w serbskich gmejnach wotwožuje. Techniski wuběrk wokrjesneho sejmika je tutón tydźeń nadawk za to předewzaću Veolia dał, za kotrež Ryćerjec firma to hižo wjele lět wukonja. Po prěnim rozdawanju nowych nadawkow we wokrjesu běštej dwě firmje znapřećiwjenje zapodałoj. Na to bě zarjad zwěsćił, zo njebě spočatnje wuzwolene předewzaće z Wojerec wšě wuměnjenja spjelniło.


Wodosport

Nowy centrum płachtakowarjow při Lejnjanskim jězorje ma kónc lěta dotwarjeny być. Kaž tamniše wodosportowe towarstwo zdźěli, tuchwilu hišće na fasadźe dźěłaja. Paralelnje zatwarja elektriku a sanitarne připrawy. Centrum budźe bjez barijerow, dokelž ma so tež wot zbrašenych sportowcow wužiwać. Nowotwar płaći něhdźe 850.000 eurow. Čłonojo towarstwa tójšto twarskich dźěłow sami wukonjeja.


Ludwik Kola zemrěł

W starobje 86 lět je štwórtk wječor w Choćebuzu dołholětny nawoda serbskeho rozhłosa Ludwik Kola zemrěł. Wón je nimale 40 lět w rozhłosu dźěłał a jón wot 1963 hač do 1989 tež nawjedował. Po załoženju rańšeho programa w Budyšinje wutwori rodźeny Radworčan w Choćebuzu delnjoserbsku redakciju při pozdźišim braniborskim sćelaku RBB. Za tójšto serbskich šlagrow 60-tych a 70-tych lět je Ludwik Kola teksty napisał.

posledni raz aktualizowane: 10. požnjenca 2018, 09:29 hodź.