Powěsće: srjedu, 12.09.2018


Njeswačidło: Dróša pěstowarnja

Njeswačanska pěstowarnja "Maks a Moric" budźe za staršich dróša. To je wčera gmejnska rada Njeswačidło wobzamknyła. Zaleži to na wyšich wudawkach mjez druhim za personal dla noweho personalneho kluča w Sakskej. Nowy popłatk płaći wot 1. oktobra a wučini za 9 hodźinske přebywanje w žłobiku nětko 209 město dotalnje 170 eurow, za pěstowarske městno 132 město dotal 108 eurow a za 6 hodźinske přebywanje w horće 72 město dotal 59 eurow.


Slepo: Šulerjo w serbskim rěčnym lěhwje

45 šulerjow 5. do 7. lětnika Slepjanskeje Wyšeje šule přebywa w tutym tydźenju w Budyšinje w serbskorěčnym lěhwje. Kaž wučer Ludwig Eckert zdźěli, pobychu šulerjo póndźelu w Němsko-serbskim ludowym dźiwadle, wčera su Budyski internat wopytali a dźensa zaběraja so ze serbskimi medijemi a wopytaja mjez druhim tež studijo Serbskeho rozhłosa. Loni pobychu šulerjo w Čornym Chołmcu, klětu budu potom někotre dny w Njeswačidle.


Zły Komorow: Přihoty na konferencu

Dwaj dnjej do konferency k strukturnemu wuwiću we Łužicy su wotběh, referenća a moderatorojo dźěłarničkow jasne. To praji wčera w Budyšinje referent Domowiny, Pětr Brězan. Konferenca, kotraž wotměje so jutře a zajutřišim na Braniborskej techniskej uniwersiće w Złym Komorowje, je zjawna a zastup darmotny. Kóždy zajimc, kiž chce so na diskusiji wobdźělić, je wutrobnje witany, tak Pětr Brězan.


Nowa Wjeska: rěčnišćo Klóšterskeje wody wožiwja

Krajny zarjad za rěčne zawěry je pola Noweje Wjeski započał, rěčnišćo Klóšterskeje wody zaso wožiwić. Dla niskeje wody je rěčka tam přeco zaso wusaknyła. Błóto a sedimenty maja so wotstronić, zo woda tam zaso bjez problemow ćeče. Při přibrjoze ma biotop nastać. Nimo toho chce so zarjad prócować, zo zaso ryby we wodźe płuwać móža. Twarske dźěła maja lěto trać, płaća na 1,7 milionow eurow a so wot kraja a zwjazka zapłaćitej.


Budyšin: K 90-ćinam Wórše Lanzyneje

W Serbskej kulturnej informaciji w Budyšinje přihotuja wustajeńcu na česć wuměłče Wórše Lanzyneje, kiž je wčera swoje 90. narodniny woswjećiła. Pod hesłom "Žiwjenje a tworjenje" budu eksponaty widźeć, kiž je Lanzyna jako molerka a grafikarka w běhu žiwjenja stworiła. Wórša Lanzyna je po zakónčenju šule wukubłanje w hornčerni absolwowała a je po tym w Praze a Lipsku wuměłstwo studowała. Wona bydli w Barće pola Budyšina. Wustajeńca wotewri so dźensa za tydźeń.


Maćica Serbska: Tři wulke jubileje

Z prěnimi přihotami na 175. róčnicu załoženja Maćicy Serbskeje je so wčera předsydstwo zaběrało. Serbske wědomostne towarstwo tutón jubilej w lěće 2022 woswjeći. W samsnym lěće spominaja na 150. posmjertniny Handrija Zejlerja a 200. narodniny Korle Awgusta Kocora, kiž běštaj sobuzałožićelej Maćicy. Dale dorěčachu sej, kak wobdźělenje na naprašowanju wšěch serbskich towarstwow a zwjazkow zaručeja , kotrež Domowina wot kónca septembra hač dosrjedź oktobra přewjedźe.

posledni raz aktualizowane: 12. požnjenca 2018, 08:57 hodź.