Powěsće: sobotu, 29.09.2018


Dźěłowe wiki

W Hornjej Łužicy bě kónc septembra něšto přez 18.200 ludźi bjezdźěłne, 440 mjenje hač měsac do toho. Z tym je bjezdźěłnosć porno awgustej wo 0,1 na 6,5 procentow spadnyła. Wokomiknje móže dźěłowa agentura Budyšin 4.600 dźěłowych městnow posrědkować. Najwjace z nich poskićuja so w hospodarskich posłužbach, předźěłacym přemysle, wikowanju, awtowych zamkarnjach, strowotnistwje a twarstwje.


Berlin: Mjeńšinowa rada

W Berlinje je so Mjeńšinowa rada Němskeje wčera prěni raz z nowym zamołwitym němskeho knježerstwa za narodne mjeńšiny zetkała. Při tym dźěše wo starosće Sinti a Romow kaž tež mjeńšiny Frizow, ale tež wo serbske naležnosće, kaž na přikład tež wo to, zo měli Serbowki skónčnje tež žónsku formu swójbneho mjena wužiwać směć. Nowy zamołwity za mjeńšiny při němskim knježerstwje je wot apryla dr. Bernd Fabritius z Mnichowa. Wón je w Rumunskej rodźeny Němc. Na zetkanju wobdźělichu so tež wjacori Serbja, mjez nimi předsyda Domowiny, Dawid Statnik.


Kamjenica: "Sakska - Čěska. Tak bliska, tak zdalena"

Sakski statny muzej za archeologiju w Kamjenicy pokazuje wot wčerawšeho wustajeńcu "Sakska - Čěska. Tak bliska, tak zdalena". Widźeć je tež wjele eksponatow z Hornjeje Łužicy a z klóštra Marijineje Hwězdy. Ekspozicija wěnuje so kulturelnym poćaham mjez Sakskej a Čěskej wot zažnych stawiznow hač do přitomnosće. Wona je nastała w kooperaciji z Narodnej galeriju w Praze. Klětu budźe wustajeńca w Praze. Patrónaj wustajeńcy staj sakski ministerski prezident Kretschmer a čěski premier Babiš.


Kulow: Start za twar noweje katolskeje pěstowarnje

W Kulowje su wčera dopołdnja zakładny kamjeń za nowe katolske dźěćace přebywanišćo połožili. Nowotwar nastanje blisko zakładneje šule a płaći štyri miliony eurow. Jeho nošer wostanje kaž dotal Kulowska wosada. W nim budźe potom tež zaso serbskorěčna skupina kaž hižo dotal. W tuchwilnym Kulowskim dźěćacym domje je 15o dźěći w žłobiku, pěstowarni abo horće - w nowym domskim budźe potom městno za 215 dźěći.


Serbski bus w Dolnich Bojanovicach

Wjac hač 30 Serbow wobdźěli so wot dźensnišeho hač do wutory we wsy Dolni Bojanovice na Južnej Morawje w Čěskej na lětušej kermuši, kotruž mjenuja tam hody. Nimo skupiny wokoło Kukowčana Fabiana Kaulfürsta je so lětsa prěni raz tež wjetša skupina abiturneho lětnika 1996 Budyskeho Serbskeho gymnazija tam podała. Kontakty mjez Serbami a Čechami w Dolnich Bojanovicach wobsteja hižo dlěje hač 50 lět.

posledni raz aktualizowane: 01. winowca 2018, 10:23 hodź.