Powěsće: pjatk, 02.11.2018


Šulstwo: Jenička přidružnica

Na wšitkich serbskich šulach je wčera jeničce jedna přidružnica započała swoju třiměsačnu kwalifikaciju na wučerja. Je to studowana sorabistka, kotraž skutkuje tuchwilu na Ralbičanskej šuli. Dohromady je so w Hornjej Łužicy 33 přidružnikow přistajiło - 75 pak je poprawom trěbnych. Klětu wot 1. februara móža započeć połnje dźěłać. Powšitkownje je situacija na serbskich šulach wučerjow nastupajo spokojaca, praji wčera Bosćij Handrik wot krajneho šulskeho zarjada. Zakłady su tuchwilu hač na wyšu šulu w Ralbicach a na Serbskim gymnaziju zaručene, tak Handrik dale. Krajny šulski zarjad spyta situaciju polěpšić.


Budyšin: Aktualny staw wědy

Do noweje wosebiteje wustajeńcy "Stary lud" zapřija Serbski muzej najnowše wědomostne dopóznaća, z čimž chce tež dotal rozšěrjene předstawy korigować. Na přikład su słowjanske kmjeny najzašo hakle kónc sedmeho lětstotka do Łužicy zapućowali, dotal je so z toho wuchadźało, zo sta so to hižo w 6. lětstotku. To rjekny kuratorka wustajeńcy Andreja Pawlikowa wot Serbskeho muzeja. Nowa wosebita wustajeńca so njedźelu ze swjedźenskim zarjadowanjom wotewri a wěnuje so žiwjenju Łužičanow a Milčanow w zažnym srjedźowěku.


Wostrowc: Měrowy swjedźeń

Na 2. měrowym swjedźenju we Wostrowcu su tež Serbja pódla. Referentka dekanatneho dušepastyrstwa Diana Pawlikowa wobdźěli so sobotu na wjacerěčnym měrowym paćerju, hdźež serbske próstwy a serbski tekst přednjese. Zajimcam poskića serbske młodźinske socialne dźěło, sej zhromadnje z Budyšina na měrowy swjedźeń do Wostrowca dojěć. Přizjewjenja su dźensa hišće hač do dwanaćich móžne. Měrowy swjedźeń so přewjedźe jako znamjo přećiwo prawicarjam. Tući we Wostrowcu tutón kónc tydźenja festiwal "Schild und Schwert" organizuja.


Schadźowanka: Kartki kupić

Wot wčerawšeho su kartki za 134. Schadźowanku na předań. Kupić hodźa so tute lětsa jeničce při kasy Němsko-Serbskeho ludoweho dźiwadła. Skazanki su tež online móžne. Za Schadźowanku dyrbitej so dwě kartce knihować, jónu městno za program w žurli dźiwadła a jónu za zabawu w foyeru. 360 kartkow je na předań.


Europeada: Termin steji

Štwórta Europeada w lěće 2020 w Awstriskej pola Korutanskich Słowjencow so wot soboty 20. junija do njedźele 28. junija wuhraje. Termin zamołwići Federalneje unije europskich narodnych mjeńšin wčera wozjewichu. Zhromadna próstwa Serbskeho Sokoła a Domowiny Europeadu w juliju - tydźeń do wulkich lěćnych prózdnin hrać - njebu přiwzata. Korutanskim Słowjencam so termin w juniju prosće lěpje hodźi, dokelž je to čas turistiskeje předsezony. Nimo toho su kapacity pomocnikow a organizaciskeho teama w juniju najlěpše. We Łužicy pak maja šulerjow tutym času hišće šulu a pruwowanja, tak zo njebudźe wšitkim serbskim koparkam a koparjam kaž tež přiwisnikam móžne, so na Europeadźe wobdźělić.

posledni raz aktualizowane: 02. nazymnika 2018, 08:53 hodź.