Powěsće: póndźelu, 26.11.2018


Bórkowy: Myto Miny Witkojc

Myto Miny Witkojc přepoda sobotu w Bórkowach braniborska ministerka za wědomosć, slědźenje a kulturu, dr. Martina Münch Žylojskej WITAJ-pěstowarni "Mato Rizo". Krajne myto za prócowanje wo serbsku rěč so prěnjemu razej spožči. Je z 2.500 eurami dotěrowane. Dźěći mytowaneje pěstowarnje w nošerstwje Serbskeho šulskeho towarstwa předstajichu rejki a spěwčki. Program wobrubištej čłonce delnjoserbskeho dźěćaceho a młodźinskeho ansambla. Wobdźělili su so zastupjerjo krajneje a komunalneje politiki, serbskich institucijow a towarstwow z Delnjeje a Hornjeje Łužicy. Žylojske kubłanišćo bě prěnje, kiž je před 20 lětami WITAJ-projekt zawjedło.


Ralbicy: W swětłej cyrkwi

Ralbičanska wosada je wčera w nětko ponowjenej cyrkwi swoju kermušu swjećiła. Mnozy chwalachu po kemšach, zo je wona wo wjele swětliša hač do toho. Pjeć měsacow trajachu dźěła, kotrež su hač na mjeńše dźěła wšitke zdokonjane. Wosadny farar Delan dźakowaše so wšěm, kotřiž su je podpěrali, ale tež tym, kotřiž su ju kóždy tydźeń za njedźelne Bože słužby wurjedźili. Dźensa, na swjatu Katyrnu, swjeći Ralbičanska wosada swój patronatny swjedźeń.


Serbska murja: Nowy kwis za smartphone

Skupina Serbska Murja je sobotu na Schadźowance nowu serbsku aplikaciju za smartphony předstajiła. App rěka "Quizserb" a wužiwarjo móža tuchwilu w 17 kategorijach něhdźe 1.000 prašenjow wotmołwić, hornjoserbsce abo němsce. Projekt je w nadawku Załožby za serbski lud nastał.


Chrósćicy: Firmowanje a zetkanje

W Chróšćanskej farskej cyrkwi bu wčera 34 młodostnych wot biskopa Heinricha Timmereversa firmowane. Nimo toho je wčera, na swjedźenju Chrysta Krala, dekanatna młodźina swoje kóždolětne zetkanje w Chrósćicach přewjedła. Po nyšporje z wosadnymi a nowofirmowanymi přizamkny so bjesada při kofeju a tykancu na farje. Jan Brězan rozprawješe něhdźe 30 młodostnym wo swojim času w Awstralskej a Nowoseelandskeje.


Budyšin: Migraciski pakt UN

Štwórtu njedźelu zasobu su wčera popołdnju přećiwnicy planowaneho Migraciskeho pakta UN w Budyšinje demonstrowali. Něhdźe 200 ludźi zhromadźi so na naměsće před dźiwadłom. Prěnjemu razej wotmě pak so cyle w bliskosći napřećiwna demonstracija, organizowana wot měšćanskich parlamentariskich frakcijow Zelenych, SPD a Lěwicy - hdźež so 100 ludźi wobdźěli. Tući so pod motom "fakty město fake-newsow" wo migraciskim pakće informowachu. Z paktom chcedźa kraje wobchadźenje z migrantami mjezynarodnje rjadować..


Bratisława: Na česć Juraja Kubańki

Balet a chór Serbskeho ludoweho ansambla stej kónc tydźenja w Bratislawje k česći 90-ćinow Juraja Kubańki wustupiłoj. Zhromadnje z tamnišim ansamblom SLUK, kotryž bě słowakski choreograf za swój čas natwarił, měješe Serbski ludowy ansambl sobotu dwě wupředatej předstajeni w tamnišim narodnym dźiwadle. Nimo toho su so tež někotři něhdyši rejowarjo SLA na programje wobdźělili. Juraj Kubańka bě wjele lět w Budyšinje skutkował a tudyši ansambl profesionalizował. Wčera su so čłonojo ansambla do Łužicy nawróćili.

posledni raz aktualizowane: 26. nazymnika 2018, 09:52 hodź.