Powěsće: sobotu, 01.12.2018


Rada Załožby za serbski lud: Wurunany etat

Rada Załožby za serbski lud je na swojim posedźenju wurunany etat za lěto 2019 we wysokosći dobrych 20 milionow eurow wobzamknyła. Najwjace pjenjez wuda so za serbske institucije - dohromady 17,5 milionow eurow. Z wotstawkom najwjace přiražkow dóstanje při tym Serbski ludowy ansambl - a to 5 milionow eurow. Za projektowe spěchownje zwostanje w etaće Załožby za serbski lud 2,5 milionow eurow, tak rozsud rady. Tuta wobzamkny nimo toho cyłu lisćinu předewzaćow za digitalne projekty, wo kotrež měła so Załožba nětko starać. Dźe wo naprawy, kotrež rěč spěchuja, prawopisnu kontrolu a awtomatiske přełožowanje kaž tež wo downloady serbskich zynkonošakow.


Slepo: Wužohnuja dźěćetko

W Slepjanskej cyrkwi wužohnuje so jutře na dwurěčnych swjedźenskich kemšach Slepjanske dźěćetko. Lětsa je tomu 100 lět, zo je serbski farar Matej Handrik k prěnjemu razej Slepjanske dźěćetko w cyrkwi wužohnował - běše to prěnjeho adwenta 1918. To swjećachu w Slepom prěnje měrliwe hody po 1. swětowej wójnje. Znamjo za wopory wójny a zemrětych je hač do dźensnišeho módra šnórka, kiž so Slepjanskemu dźěćetku w kemšach na chribjet přityknje. Hudźbnje wobohaća kemše spěwarki a spěwarjo towarstwa "Kólesko".


Radwor: Hodowne wiki šulerjow

K jědnatemu razej wotměja so dźensa a jutře w Radworskej "Slawiji" hodowne wiki. Šulerjo a wučerjo tamnišeje Wyšeje šule su w běhu projektneho tydźenja mjez druhim paslenki zhotowili, kiž su na předań. Nimo toho su šulerjo tež kisy kał nadźěłali, kiž so hosćom poskića. Dale dožiwja wopytowarjo na woběmaj dnjomaj nowy dwurěčny musical z mjenom "Cyketarušk Rumpi we Łužicy" - w nim skutkuje wjace hač 50 šulerjow sobu.


Łužiska jězorina: Nowy kanal mjez jězoromaj

Łužiska jězorina je bórze wo atrakciju bohatša. Za kanal Borbory su tutón tydźeń čakanske areale za čołmy dotwarili, k tomu tež puće po wodźe markěrowali. K spočatkej noweje sezony klětu nalěto ma so kanal potom oficialnje přepodać. Kanal Borbory je něhdźe kilometer dołha kumštna rěka, po kotrejž móža čołmy mjez Lejnjanskim a Parcowskim jězorom jězdźić. Je to hižo druhi kanal we Łužiskej jězorinje. Prěni bu před šěsć lětami mjez Złykomorowskim a Parcowskim jězorom wotewrjeny.


Pančicy-Kukow: Pytaja za hosćenc wotnajerja

Klóšter Marijina hwězda w Pančicach-Kukowje pyta za tamniši hosćenc noweho wotnajerja, kotryž móže jón wot 1. januara přewzać. Kaž abatisa Gabriela wčera praji, ma so "Klóšterska stwička" na kóždy pad dale wjesć. Hižo chwilu za nowym wotnajerjom pytaja, ale je ćežko někoho namakać, tak abatisa, wosebje někoho, kotryž dlěje wostanje. Dotalny wotnajer hosćenca w Pančicach-Kukowje skónči kónc lěta swoje zrěčenje.

posledni raz aktualizowane: 02. hodownika 2018, 17:00 hodź.