Powěsće: póndźelu, 03.12.2018


Pančicy-Kukow: Wottorhaja stary hosćenc

Gmejna Pančicy-Kukow chce klětu dodźeržanu něhdyšu korčmu wosrjedź wsy zwottorhać. Před něšto měsacami je gmejna wotpowědne chěže za jedyn euro kupiła. Hišće lětsa so wo spěchowanje za zwottorhanje požadaja, praji wjesnjanosta Markus Kreuz. Dokelž pak dyrbi so gmejna po přirodoškitnych předpisach měć, zwottorhaja něhdyšu korčmu najskerje hakle klětu w nazymje


Adwent w Slepom:100.wužohnowanje dźěćetka

Na wčerawšich dwurěčnych swjedźenskich kemšach w Slepjanskej cyrkwi je so dźěćetko wužohnowało. Tole sta so 100. króć po prěnim wužohnowanju w lěće 1918 kónc prěnjeje swětoweje wójny. Slepjanske dźěćetko poby tež na serbskim ewangelskim wosadnym popołdnju a na adwentnym koncerće Slepjanskeho folklorneho ansambla.


Na mnohich blakach w Hornjej Łužicy adwentne wiki

Kónc tydźenja wotměchu so adwentne wiki na mnohich blakach Hornjeje Łužicy. Kaž na přikład wčera w Njebjelčicach: z dźěćacym karuselom, rumpodichom a programom Njebjelčanskeje pěstowarnje. Hudźbnje je ewangelski pozawnowy chór z Kamjenca wiki wobrubił. - We Serbskich Pazlicach wužichu zazběh do adwentneho časa sobotu wječor za bjesadu a zetkanje na nawsy. Zhromadnje zaswěćichu hodowny štom. Na 50 wjesnjanow sćěhowaše přeprošenju mlodźinskeho kluba a při woheńčku, horcym winje a praženej kołbasce hišće pobjesadowaše. - W Radworskej "Slaviji" zahrachu šulerjo k adwentnym wikam sobotu a njedźelu štyri króć hodowny musical. - W Njeswačidle na torhošću wotměchu so sobotu dohodowne wiki. K tomu so w tamnišim muzeju wustajeńca wo pyramidach wotewrě. - Dalše adwentne wiki běchu w Malešecach, Ćisku, Brětni-Michałkach a w Čornym Chołmcu.


Prěni adwent w Chrósćicach

W Chróšćanskej putniskej hospodźe bu sobotu wječor 8. Kulturna zyma zahajena. Něhdźe 20 wopytowarjow je přichwatało na wotewrjenje wustajeńcy "Historiske serbske pohladnicy", kotruž je zestajił zběraćel Gerat Šmelink ze Šunowa. K jich stawiznam wědźeše tójšto epizodow powědać. Hižo na pózdnim popołdnju zahajichu na nawsy Chróšćanske towarstwo "Domizna" a wobydlerjo adwent ze zaswěćenjom hodowneje pychi, z dujerskej hudźbu, horcym winom a přikuskami.


Na zwjazkowej olympiadźe rušćiny

Tereza Kubicec z Lejna, kiž chodźi w Kamjencu na Lessingowym gymnaziju do jědnateho lětnika, je so hač do soboty na wubědźowanju najlepšich rušćinarjow Němskeje w Bremenje wobdźěliła. Jedne wot prěnich třoch městnow swojeje skupiny njeje wobsadźiła - dalše městna so njepostajichu. Po Sakskim wubědźowanju běchu ju a dalšich ze Sakskeje wo jedyn schodźenk wyše zastopnjowali - na B2, štož wotpowěduje 12. lětnikej. Ze sakskeje 7-čłonskeje skupiny je sej jenički wobdźělnik z Drježdźan myto zdobył.

posledni raz aktualizowane: 03. hodownika 2018, 10:06 hodź.