Powěsće: srjedu, 05.12.2018


Swjedźeń swjateje Borbory w Choćebuzu

Sakska a Braniborska chcetej z Łužicy modelowy region za wuspěšnu změnu struktury sčinić. To rjekny sakski ministerski prezident Kretschmer wčera před tysac hosćimi na swjedźenju swjateje Borbory w Choćebuzu. Energijowy koncern LEAG připowědźi, zo chce přichodnje nimo zmilinjenja brunicy dalše hospodarske pola wotkryć, hłownje mysla na nowe technologije w energijowym sektorje. Jeničce Choćebuski wyši měšćanosta Kelch naspomni w swojej narěči Serbow, zo jim wudobywanje brunicy škodźi.


Budyšin - Warnoćicy: Nowa kniha wo přisłowach

Čěski awtor Milan Hrabal z Warnoćic je wčera w Budyskim Serbskim muzeju swoju nowu trojorěčnu knihu wo přisłowach předstajił. Je to zběrka čěsko-serbsko-němskich přisłowow, kiž je 64-lětny lěta dołho hromadźił. Milan Hrabal zaběra so hižo dawno ze serbskimi přisłowami a je je tež hižo we wjacorych knižkach wudał. Najnowša nasta w měšćanskej bibliotece we Warnoćicach, hdźež bě awtor a wudawaćel přistajeny, prjedy hač je na wuměnk šoł .


Smječkečanska ewangelska katechetka přestanje

Zamołwita za dźěło z dźěćimi w ewangelskej wosadźe Halštrow-Protecy-Smječkecy, Karin Morgenrothowa, póndźe kónc lěta na wuměnk. Wot lěta 1999 staraše so wona mjez druhim wo kubłanje dźěći kóždy měsac na bibliskich kruhach, wo swójbne kemše a wo tydźensku křesćansku wučbu. Wot noweho lěta přewozmje tute dźěło z dźěćimi zamołwita Porchowskeje ewangelskeje wosady.


Hórnikečanski jězor: Plany do přichoda

Po saněrowanju Hórnikečanskeho jězora ma na južnym přibrjoze centrum za towarstwa nastać. Wčera je gmejnska rada Łaz trěbne dojednanje wo financowanju z hórnistwowym saněrarjom LMBV wobzamknyła. Gmejna ma jenož 15 procentow kóštow sama zapłaćić. Je to wažna kročel za wožiwjenje Hórnikečanskeho jězora, kiž budźe wot 2021 zaso přistupny. Cyłkowny plan wobsahuje kołopuć, promenadu z małymi wobchodami, bungalowy a stanowanišćo, přistawy za čołmy a kupanišćo a so wot Sakskeje spěchuje.


Wokrjes Budyšin: Chudoba w starobje hrozy

Dźeń a wjace wobydlerjam Budyskeho wokrjesa hrozy w starobje chudoba. Z tym liči dźěłarnistwo za zežiwidła a hosćency. Po tym by něhdźe 34.000 dźensa přistajenych - by-li dale tak mało zasłužiło kaž dotal - pozdźišo mjenje renty dóstało hač je to zakładne zawěsćenje w rentowym systemje, potajkim mjenje hač 704 eura. To by něhdźe štwórćinu wšěch tuchwilu we wokrjesu přistajenych potrjechiło. Tuta ličba wuńdźe z rentoweje analyzy Pesteloweho instituta. Wědomostnicy z Hannovera złožowachu so při tym na statistiki, kotrež su w nadawku dźěłarnistwa wuhódnoćili.

posledni raz aktualizowane: 05. hodownika 2018, 08:23 hodź.