Powěsće: póndźelu, 31.12.2018


Serbski muzej a lěto 2018

Serbski muzej w Budyšinje je ze swojej lětušej dźěławosću přewšo spokojom. Po dlěšim času nalićichu lětsa zaso wjace hač 15.000 wopytowarjow. Kaž rjekny nawodnica muzeja Christina Boguszowa, je tomu wosebje wustajeńca wo Krabaće dopomhała. W zwisku z tutej mějachu 92 zarjadowanjow. Dalša wosebita wustajeńca je pokazała twórby Reginy Herrmannoweje. Hač do nalěća je hišće pokazka "Stary lud" widźeć.


Ludowe nakładnistwo Domowina bilancuje

Ludowe nakładnistwo Domowina je lětsa měło jara pisany spektrum wudatych knihow, praji jednaćelka Marka Maćijowa. Dźěćace knihi wuda nakładnistwo pak z druhich rěčow přełožene, pak originalne serbske. Derje poradźił je so zazběh ze słuchopisakom bookiijom, tak Maćijowa. Nimo toho su lětsa mjez druhim wušli krimi Lubiny Hajduk-Veljkovićoweje, awtobiografiska zběrka Benedikta Dyrlicha a dopomnjenki Serbow po cyłej Łužicy z pjera Křesćana Krawca.


Přewšo suche lěto 2018

Lěto 2018 bě w wšelakich kónčinach Hornjeje Łužicy hišće suchiše hač dotalne rekordne lěto 2003. Wuchodnje Budyšina je so lětsa dohromady 452 litrow dešćika na kwadratny meter našło, to je nimale 150 litrow mjenje hač w dołholětnym přerězku. We wsach při Klóšterskej wodźe su tróšku wjace spadkow naměrili, ale tež tam bě lěto nadměru suche. 2018 bě tež dalše nadpřerěznje ćopłe lěto: Wosebje w aprylu a septembrje běchu temperatury wo tójšto wyše hač zwučene.


Hodowny koncert Lipy w Róžeńće

Na hodownym koncerće chóra Lipa njedźelu běše Róžeńčanska cyrkej kopaće połna. Na koncerće zaspěwachu spěwarjo pod nawodom dirigentki Jadwigi Kaulfürstowej klasiske kaž tež moderne hodowne spěwy. Přewodźeli su jich směčkarjo, klawěr a pišćele. Po koncerće hromadźichu dary za Róžeńčansku maćerju Božu, kotraž so hižo někotre měsacy restawruje. Sobotu měješe tež chór Meja swój tradicionelny hodowny koncert w Radworju.


Kwisowa app ma so rozšěrić

Dotal je sej wjace hač 300 ludźi nowu serbsku aplikaciju "QuizSerb" instalowało. W 17 wšelakich kategorijach móže wužiwar na wjace hač tysac serbskich prašenjow wotmołwić. Skupina "Serbska Murja", kiž je app w nadawku Załožby za serbski lud wudała, dźěła dale na rozšěrjenju poskitka. Tak měrja so zamołwići na wužiwarjow z próstwu, dalše prašenja abo namjety za polěpšenje zapodać. Dźensa wječor su čłonojo Serbskeje Murje z hosćom we wusyłanju Radija Satkule.

posledni raz aktualizowane: 31. hodownika 2018, 10:02 hodź.