Powěsće: pjatk, 04.01.2019


Kultura: Dźiwadłowe lěto 2019

Na planje Němsko-Serbskeho ludoweho dźiwadła steji lětsa cyłkownje 22 serbsko- a němskorěčnych premjerow. Hnydom prěnju serbskorěčnu pokazaja na hłownym jewišću. Hra "Wopušćeny dom" powěda swójbnu stawiznu z potajnstwami, prapremjera je spočatk měrca. Awtorka Carla Niewöhner bě z hru 2017 při wubědźowanju łužiskich dźiwadłow spěchowanske myto dobyła.


Budyšin: Přetwar po planje

Přetwar Budyskeho dwórnišća je derje w planje. To zdźěli inwestor na naprašowanje. W pobočnymaj dźělomaj twarjenja z połnej paru na nutřkownym wutwarje dźěłaja. Srjedźa w něhdyšej dwórnišćowej hali so tuchwilu wjerchi, sćěny a šachty za lift twarja. W meji ma třěcha srjedźneho dźěla hotowa być. Paralelnje chcedźa w nalěću z wonkownym arealom započeć. Kónc lěta ma dwórnišćo hotowe być. W twarjenju nastawa tójšto běrowow, jedyn z wotnajerjow budźe Budyski krajnoradny zarjad.


Wojerecy: Lětsa dwaj jubilejej

Město Wojerecy woswjeći lětsa 60. jubilej zwěrjenca. Nimo toho by rězbar Jürgen von Woyski lětsa swoje 90. narodniny swjećił. Tohodla změja w juniju zaso sympozij rězbarjow. K woběmaj jubilejomaj planuje město tež wosebitu wustajeńcu a knihu. Wojerowski zwěrjenc bu 1959 załoženy a w běhu lět dale rozšěrjeny. Wot lěta 1994 je jako zwěrjenc z wědomostnym nawodom připóznaty.


LMBV: Doskrućuja nasypy

Saněrowar něhdyšich jamow LMBV je loni we Łužicy 670 hektarow nasypow doskrućił. Tute płoniny njejsu z tym hižo zawrjene a hodźa so wužiwać. Mjez druhim jedna so při tym wo dźěl areala wokoło Jantaroweho jězora pola Bórkhamora. Na dalšich pasmach LMBV hišće dźěła, su to hłownje nasypy jamow z časa NDR, kotrež dyrbja so skrućić.


Budyšin: Techniski defekt w studiju

Wusyłanje Serbskeho rozhłosa a regionalneho programa MDR-a je wčera rano techniskich problemow dla wupadnyło. Přičina bě defekt syće, kotraž Budyske studijo ze zbytkom MDR-a zwjazuje.

posledni raz aktualizowane: 04. wulkeho róžka 2019, 11:42 hodź.