Powěsće: wutoru, 08.01.2019


Drježdźany: Wučerjo wopismo dóstali

W Drježdźanach je wčera prěnje 75 wučerjow dóstało wopismo, zo su wotnětka zastojnicy. Wosemjo běchu z Hornjeje Łužicy. We wokrjesomaj Budyšin a Zhorjelc je dotal něhdźe 500 wučerjow stajiło próstwu na to,so ze zastojnikom stać - mjez nimi tež serbscy wučerjo. Próstwy so w přichodnych tydźenjach pruwuja. Mužojo a žony pod 42 lětami, kotřiž su wukubłani wučerjo, móža so ze zastojnikom stać. W Hornjej Łužicy potrjechi to 570 kubłarjow wšěch šulskich družinow.


Kulow: Hort dotwarjeny

W Kulowje maja nětko kompletnje dotwarjeny centralny hort. Stare dwórnišćo bu mjeztym na wšitkich třoch poschodach přewtarjene. Tuchwilu je w tamnišim horće 113 dźěći zaměstnjene. Z pomocu spěchowanskeho programa "Mosty do přichoda" a z pjenjezami města bu stare dwórnišćo wot nazymy 2016 za dohromady 640.000 eurow přetwarjene. Nošer objekta je Křesćansko-socialny skutk CSB.


Młodźina: Protyka hotowa

Nowa serbska młodźinska protyka z pokiwami na zarjadowanja je hotowa. Kaž praji socialna dźěłaćerka RCW, Marija Koklina, chcedźa ju nětko w młodźinskich klubach rozdźělić. Nimo toho maja zajimcy móžnosć, sej protyku darmotnje na přikład w Rěčnym centrumje WITAJ wobstarać. Naćisnył je ju młody Serb Milan Süß. Protyka je zhromadny projekt młodźinskeho towarstwa PAWK, Župy "Jan Arnošt Smoler" a młodźinskeje socialneje dźěłaćerki RCW.


Mały Wjelkow: Katastrofalne lěto

Loni bě za labyrint w Małym Wjelkowje katastrofalne lěto, rjekny šefina Regina Frenclowa. Wčera před lětom bě so zachod kompletnje wotpalił, w meji je lawina z błóta zahrodu zapusćiła a w lěću wopytowarjo dla přewulkeje horcoty njepřińdźechu. Dohromady je Małowjelkowski labyrint měł 40.000 hosći - 10.000 mjenje hač hewak. Lětsa ma so wón najpozdźišo 1. apryla zaso wotewrěć.


Sport: Negatiwny rekord

Za 37. Sokołski wolejbulowy turněr wo pokal Domowiny je so hač do kónca přizjewjenskeho časa 12 mustwow přizjewiło. To je za jedyn z najwjetšich wolejbulowych turněrow we Łužicy negatiwny rekord. Loni bě so 16 cyłkow wobdźěliło, na turněrach do toho stajnje přez 20. Přičina za mało přizjewjenjow móhli žónske póstnicy w Kulowje być, kiž přewjedu so na samsnym dnju. Serbski Sokoł zarjaduje a wuhotuje wubědźowanje 2. měrca w Budyšinje.

posledni raz aktualizowane: 08. wulkeho róžka 2019, 08:24 hodź.