Powěsće: póndźelu, 08.07.2019


Chrósćicy: Folklorny festiwal zakónčeny

Lětuši 13. mjezynarodny folklorny festiwal je na 22.000 wopytowarjow a 1.000 wuměłcow dožiwiło, štož je nowy rekord. Kaž nawoda přihotowanskeho komiteja, Marko Kowar zdźěli, bě kónc tydźenja w Chrósćicach runje tak kaž w Budyšinje a Hochozy wjac wopytowarjow hač před lětomaj. Sobotu a wčera wustupi w Chrósćicach na sydom dworach a při Fulkec hórce cyłkownje 33 folklornych skupin z tu- a wukraja. Mjez nimi běchu ansamble z Peruwa, Boliwiskeje, Algeriskeje, Pólskeje, Georgiskeje, Madźarskeje, Awstriskeje, Ruskeje, Nepala, Słowakskeje, Čěskeje a Makedonskeje. Skupina Bobáňovci z Terchova w Sewjernej Słowakskej dósta wčera na finalu za swój wurjadny wuměłski wukon wosebity diplom. Přichodny mjezynarodny folklorny festiwal budźe kónc julija 2021.


Budyšin: Serbski rozhłós dlěje wusyła

Wot klětušeho januara wusyła Serbski rozhłós wotydźenja wšědnje jednu hodźinu dlěje, a to rano hač do dźewjećich, a sobotu hač do dźesaćich. To wozjewi intendantka srjedźoněmskeho rozhłosa MDR, prof. dr. Karola Willowa sobotu na folklornym festiwalu w Chrósćicach.


Hórki: Wulki woheń na polu

Sobotu nawječor stej so blisko Hórkow na něhdźe 30 hektarach šćernišćo a lěs paliłoj. 42 wohnjowych woborow z 180 wobornikami mjez druhim z Wojerec a Porchowa je woheń zhašało. Jedyn wobornik dyrbješe sylneho kura dla do Wojerowskeje chorownje. Kaž policija wčera připołdnju zdźěli, bu woheń złowólnje zapaleny. Dalše mjeńše wohenje wudyrichu sobotu tež blisko Pěskec, Smječkec a Šešowa. Kónc tydźenja pak je so tež w Braniborskej na wjacorych blakach paliło. Tu wojowachu wobornicy zdźěla po stach přećiwo wohenjej.


Skawća: W lěhwje při morju pobyli

Serbscy skawća su so sobotu z tydźeń trajaceho skawtskeho lěhwa danskeje mjeńšiny w Němskej nawróćili. Tam su z młodostnymi z Islandskeje, Němskeje, Norwegskeje, Pólskeje a tež maćerneje Danskeje stolětne wobstaće danskeho skawtskeho zwjazka woswjećili. Wjerškaj běštej wopyt danskeje princesny Benedikty w lěhwje a pućowanje po danskim pobrjohu Baltiskeho morja z přenocowanjom w přirodźe.


Jězorina: Ćahi z Drježdźan

Kónc tydźenja je prěni lětuši ćah zaso z Drježdźan do Łužiskeje jězoriny jěł. W lěćnych prózdninach jězdźi tuta wosebita linija stajnje sobotu rano z Drježdźan přez Kamjenc a Njedźichow do Złeho Komorowa a popołdnju zaso wróćo. Jězba traje połdra hodźiny.

posledni raz aktualizowane: 09. pražnika 2019, 10:03 hodź.