Powěsće: wutoru, 09.07.2019


Festiwal: Peruančenjo hišće raz rejowali

Z małym swjedźenjom su so zamołwići folklorneho festiwala wčera wječor w Chrósćicach wšitkim pomocnikam a wobsedźerjam dworow dźakowali. K tomu je pod pomnikom na Fulkec hórce skupina z Peruwa hišće raz zahudźiła a zaspěwała a so z tym na swoje wašnje z organizatorami festiwala a z Chrósćicami rozžohnowała. Dźensa wopušća Peruančenjo jako předposledni hosćo Łužicu; jutře wotjědu potom Boliwičenjo na přichodny folklorny festiwal w Europje.


Medije: Serbja maja sej lěpje

Předsyda Mjeńšinoweje rady Němskeje, Jon Hardon Hansen, je podlěšenje rańšeho programa serbskeho rozhłosa jara witał. Při wopyće rady na folklornym festiwalu je wón poskitk Srjedźoněmskeho rozhłosa MDR za Serbow ze situaciju friziskeje mjeńšiny přirunował. Tuta ma pola Sewjeroněmskeho rozhłosa NDR jenož mało mjeńšinow radijoweho programa wob tydźeń, danska mjeńšina w Němskej pak ani nic tute. - W rozmołwje z intendantku MDR-a, profesor Karolu Willowej, namjetowaše Hansen, sej zhromadnje intendanta NDR-a do Berlina na posedźenje mjeńšinoweje rady přeprosyć a móžnosće spěchowanja mjeńšinowych rěčow w medijach na přikładźe Serbow rozwažować.


Šulske prózdniny: RKW jara woblubowany

We wjacorych serbskich katolskich wosadach je so wčera tradicionelny nabožny tydźeń dźěći (RKW) zahajił. W Chrósćicach wobdźěli so na přikład 170 dźěći, w Ralbicach je jich na 120 dźěći a wjac hač 20 pomocnikow. Budyske dźěći přebywaja tydźeń w Kukowje. Srjedu putnikuja wšitcy do Róžanta, hdźež swjeća dopołdnja zhromadne kemše.


Kulow: Za přistajenych firmy Maja bórze wjac pjenjez?

Dźěłarnistwo IG Metal a jednaćelstwo mebloweje firmy Maja chcetej w Kulowje dźensa a jutře dale jednać. Při tym dźe wo nowe tarifowe zrěčenje a lěpše dźěłowe wuměnjenja za něhdźe 900 přistajenych. Dźěłarnistwo sej žada, zo so poněčim sakskemu tarifowemu zrěčenju drjewoweje a plastoweje branže přibližuja. Aktualna měsačna mzda leži w Kulowje pječa wo hač do 600 eurow pod tarifom. Maja zhotowja w Kulowje meble za IKEA.


Dźěłowe wiki: Hdźe wostanu wučomnicy?

Krótko do spočatka noweho wukubłanskeho lěta je w Hornjej Łužicy hišće 1.400 swobodnych wučomniskich městnow. Zdobom pak 1.200 młodych ludźi hišće žane městno nima, dokelž njejsu so hišće rozsudźili abo dokelž jich cenzury njedosahaja. To pak tež rěka, zo móhł kóždy młodostny teoretisce w Hornjej Łužicy wukubłanje dóstać. Najwjace swobodnych wukubłanskich městnow je tuchwilu hišće w metalowych powołanjach, we wikowanju a w kuchnjach.


Njebjelčicy: Satkula je dobyła

Młodźinske Radijo Satkula je wčera wječor z beachvolleybulowej turu w Njebjelčicach pozastało. Na 200 ludźi je sej na turněr dojěło, w kotrymž wčera 21 mustwow wo dobyće wojowaše. Dobyło je wčera mustwo Radija Satkule. Běše to druha stacija lětušeje beachvolleybuloweje tury. Přichodnu póndźelu hraje so w Hórkach.

posledni raz aktualizowane: 09. pražnika 2019, 10:12 hodź.