Powěsće: štwórtk, 11.07.2019


Róžant: Putnikowanje dźěći nabožnych tydźenjow

Dźěći nabožnych tydźenjow serbskich wosadow podachu so wčera na putnikowanje do Róžanta. Někotři běchu pěši po puću, druzy na kolesach. Dopołdnja swjećachu zhromadnu božu mšu w Róžeńčan cyrkwi. Pomocnicy z wosadow postarachu so potym wo wobjed. Na łuce za cyrkwju běchu wjacore zaběry za dźěći spřihotowane, na přikład kopańca, rejowanje abo tež bubnowanje. Po zhromadnym nyšporje podachu so wšitcy zaso na dompuć.


Lěćne dźiwadła: Połčas w Čornym Chołmcu a w Budyšinje

Pola lěćnych dźiwadłow we Łužicy je połčas. W Čornym Chołmcu witachu na historisku hru "Krabat - elementy mocy" wjace hač 5.000 hosći. Wšitke předstajenja su wupředate, byrnjež měli lětsa wjac městnow hač hewak. Hač do kónca julija wočakuja na 11.000 wopytowarjow. Tež "Na krótšim kóncu Słónčneje aleje" na Budyskim hrodźe wjeseli so Němsko-Serbske ludowe dźiwadło přez dobry wothłós. Na 18 předstajenjach móžachu na 18.000 přihladowarjow witać.


Wochozy: Wo strukturnej změnje diskutowali

Strukturna změna we Łužicy dyrbjała so direktnje na ludźi wuskutkować. To žadaše sej zamołwity zwjazka za turizm, Thomas Bareiß, wčera na swojim wopyće w Parku błudźenkow we Wochozach. Dale připowědźi wón zakonjej, kotrejž knježerstwo tuchwilu přihotuje. Na wčerawšim zetkanju we Wochozach ze zastupjerjemi sakskeje statneje kenclije a hospodarskeho ministerstwa wuradźowachu wo šansach a problemach strukturneje změny we Łužicy.


Róžant: GiG-festiwal prěni raz z livestreamom

GiG-festiwal, kotryž wotměje so kónc julija w Róžeńće, wusyła so lětsa prěni raz přez wideo livestream w interneće. To zmóžni kooperacija mjez katólskim telewizinym sćelakom EWTN a rozhłosowym sćelakom Horeb. Wot 26. do 28. julija wustupuja mjez druhim wuměłcy a hudźbne skupiny z Irskeje, USA, Wulkobritaniskeje a wšelkich kónčin Němskeje. Lětuši GiG-festiwal je hižo štwórty w Róžeńće. Do toho swjećeše so wón dwójce jako "Alojsowy festiwal" w Radworju.


Budyšin: Wobnowja puće

Na Tuchorskej w Budyšinje twarske dźěła derje pokročuja, zdźěli rěčnik měšćanskeho zarjada André Wucht. Tuchwilu twarja při při busowym dwórnišćuna Augusta Bebelowym naměsće. Kónc oktobra ma wotrězk mjez Mukowej a Liebknechtowej hotowy być. Hižo wot 2015 wobnowja na Tuchorskej krok po kroku roły za wopłóčki, wobswětlenje a narunaja plesternaki z asfaltom.

posledni raz aktualizowane: 11. pražnika 2019, 08:43 hodź.