Powěsće: sobotu, 13.07.2019


Hornja Łužica: W Połčnicy so najwjace dešćowało

W Hornjej Łužicy je so wčera a dźensa nocy w přerězku 15 litrow dešća na kwadratny meter našło. Najwjace dešćowało je so w Połčnicy, hdźež naměrichu z tak mjenowanym ombometrom 31 litrow. Nimale 29 litrow je so w Halštrowje našło. Hinak porno tomu we wuchodźe Budyskeho wokrjesa. Jenož wosom litrow na kwadratny meter naměrichu na přikład w Kubšicach. Po wunošnym dešću je so tež pegel łužiskich rěkow a rěčkow zaso trochu powyšił.


Lěsnistwo: Najniši warnowanski schodźenk

Po někotrych hodźinach stajneho dešća w nocy na wčerawši pjatk móžeše Sakski statny zawod za lěsnistwo hižo wčera rano wšitke warnowanja před strachom lěsnych wohenjow za Hornju Łužicu zakónčić. Za wšě lěsy we wokrjesomaj Budyšin a Zhorjelc płaći nětko zaso najniši warnowanski schodźenk 1. Hač do štwórtka wječora płaćeše za lěsy wokoło Wojerec a Běłeje Wody najwyši warnowanski schodźeńk 4.


Dumpery: 3. běh Němskich mišterstwow w Baćonju

W Baćonju startuje dźensa popołdnju 3. běh Němskich mišterstwow za dumpery. Faworića su zaso serbscy wodźerjo třikolesatych jězdźidłow. Cyłkowne hódnoćenje najwjeduje amtěrowacy němski dumperowy mišter Filip Kral z Róžanta, kiž pak ma jenož snadny předskok před Pawlom Domšom ze Zejic. 4. běh přewjedźe so 31. awgusta w Drjowku, w Delnjej Łužicy. Pjaty běh, a z tym finale mišterstwow, wotměje so 29. septembra w Hórkach.


Nowe medije: "Soblex" nětko tež ze serbskimi předmjenami

Wot nětka namakaja wužiwarjo internetoweho słownika "Soblex" nowostku na stronje. Wjac hač 1200 předmjenow je so w Serbskim instituće z knižki Tima Meškanka „Serbske předmjena" do Soblexa zadźěłało. Hinak hač w knižce hodźi so tam, za kóžde mjeno, z wšěmi gramatiskimi formami pokazać. Nimo toho su so něhdźe 10 000 mjenowych formow do aktualneje wersije prawopisneje kontrole za hornjoserbšćinu zadźěłali.


Kamjenc: Zakładny kamjeń za nowotwar dźěćaceho domu

W Kamjencu su wčera zakładny kamjeń za nowotwar dźěćaceho domu połožili. Hač do klětušeho lěća nastanje w měsćanskim dźělu Brězna hort za 100 dźěći kaž tež pěstowarnja a žłobik za 70 dźěći. Lessingowe město liči z tym, zo płaći objekt něhdźe 4 a poł miliona eurow.

posledni raz aktualizowane: 15. pražnika 2019, 05:51 hodź.