Powěsće: póndźelu, 15.07.2019


Zhorjelc: Merkelowa dźensa we Łužicy

Zwjazkowa kanclerka Angela Merkelowa je dźensa we Łužicy. Hromadźe z šefom firmy Siemens, Joem Kaeserom, wotewri wona w Zhorjelcu "inowaciski-kampus". Tam maja so technologije za wužiwanje wodźika wuwiwać. Nimo toho podpisaja Merkelowa, Keaser a sakski ministerski prezident Kretschmer "pakćik do přichoda Siemens w Zhorjelcu". Koncern chcyše swój zawod w Zhorjelcu poprawom zawrěć. Po wulkich protestach pak so planow wzda. Při wšěm zhubi tam na 700 sobudźěłaćerjow swoje dźěło.


Čěska: Na Serbow spominali

W Čěskej je so sobotu na dwě serbskej demonstraciji spominało. Na hórce Mužsky - to je mjez Turnovom a Mladej Boleslavu - bě so w juniju 1933 na 30.000 Čechow zešło, zo bychu Serbow před hrožacym nacizmom podpěrali. W septembrje 1945 zetka so tam znowa něšto stow Čechow, kotřiž za samostatnosć Łužicy abo za jeje přizamknjenje k Čěskej demonstrowachu. Předsyda Towarstwa čěskich přećelow Łužicy, Lukaš Novosad, a Nowowjesčan Jurij Šołta so Čecham za tehdyšu solidaritu dźakowaštaj a předstajištaj dźensnišu situaciju we Łužicy.


Budyšin: Swjedźeń serbskeje poezije

40. swjedźeń serbskeje poezije wěnowachu sobotu wječor Kitej Lorencej. Na 50 zajimcow a lyrikarjow sćěhowaše w starej Budyskej wodowni basnjam zemrěteho serbskeho basnikarja. Łužiscy basnicy přeprošachu sej młodych serbskich awtorow kaž tež přećelow z Čěskeje a Pólskeje, znatych němskich lyrikarjow a samo kurdowsku basnicu, kotřiž tež swójske twórby přednjesechu.


Łužiska jězorina: Z łódźu po wodźe

Na Bjerwałdskim jězoru ma bórze pasažěrska łódź jězdźić. Hač do kónca awgusta chce saněrowar něhdyšich jamow LMBV wšitke wuměnjenja stworić, zo móže motorska łódź "Bigge" po jězoru jězdźić. Prjed hač smě 2 milinow eurow droha łódź na wodu, maja so hišće někotre juristiske a financielnje prašenja rozrisać. Bjerwałdski jězor je ze swojimi nimale 14 kwadratnymi kilometrami najwjetši jězor Sakskeje.


Sport: Sakski krajny pokal

Koparjo SJ Chrósćicy hraja w prěnim kole wo sakski krajny pokal 10. a 11. awgusta pola Empora Possendorfa, kotryž hraje kaž Chrósćenjo w krajnej klasy. Swój dotal najwjetši wuspěch w pokalu mějachu Chrósćenjo před dwěmaj lětomaj, jako podležachu doma w kole najlěpšich šěsnaćoch přećiwo FSV Zwickau z 0:5. K wokrjesnemu derbyjej dóńdźe k zazběhej pokalneho koła w Großröhrsdorfje. Tam nastupi krajny ligist Jednota Kamjenc pola wokrjesneho wyšeho ligista SC Großröhrsdorf. Rakečenjo hraja jako postupnik do krajneje klasy doma přećiwo Woclej Riesa.

posledni raz aktualizowane: 15. pražnika 2019, 08:05 hodź.