Powěsće: wutoru, 16.07.2019


Hornja Łužica: Kolesowarjo po puću

Wjace hač 200 kolesowarjow budźe dźensa a jutře na tak mjenowanej "Turje po wuchodźe" w Budyšinje a wokolinje po puću. Start bě hižo njedźelu z kołojězbu po Drježdźanach. Wčera su wobdźělnicy potom 70 kilometrow do Budyšina kolesowali. Dźensa je kołojězba po Hornjej Łužicy planowana - mjez druhim pojědu po Radworju, Barće a Malešecach. W sydom dnjach maja kolesowarjo nimale 500 kilometrow zmištrować. Posledni cil najwjetšeho kolesowarskeho wubědźowanja Němskeje budźe njedźelu město Torgau.


Budyšin: Hotowe kolekcije dóšli

Dobyćerske kolekcije wubědźowanja "Sorbian Street Style" su mjeztym wšitke do Serbskeho muzeja w Budyšinje dóšli. Jako přichodne maja so drasty fotografować. Potom budu wone w katalogu a we wustajeńcy widźeć, praji za projekt zamołwita, Andrea Pawlikowa. 14 kolekcijow a naćiskow k modernej serbskej drasće bu z cyłeje Němskeje zapósłane. Dobyćerske přinoški hódnoćichu so z pjenježnym mytom. Wustajeńca wotewri so srjedź septembra. W oktobrje budźe k načasnej serbskej drasće tež wosebita dźěłarnička.


Pančicy-Kukow: Lětsa 7.000 swěčkow

W klóštrje Marijina hwězda w Pančicach-Kukowje přihotuja sobotnišu "Nóc w sćinje 1.000 swěčkow". Kaž praji Sonja Hejdušcyna, maja 7.000 swěčkow, kiž na wšelakich městnach k wobrazam zestaja. Nimo toho změja lětsa pisane skleńčki, do kotrychž maja so swěčki stajeć. Z tym budu motiwy, kiž wostanu hač do soboty tajne, we wjacorych barbach widźeć. Nimo toho wustupitej sobotu wječor tež spěwar Gabriel Mommér a serbski folklorny ansambl Wudwor. 2006 je so zarjadowanje prěni króč přewjedło - lětsa budźe to potajkim 14-te.


Hórki: Beachvolleybulowa tura

Beachvolleybulowa tura radija Satkule je wčera w Hórkach pozastała. 17 mustwow je so na turněrje wobdźěliło. Kónčnu hru rozsudźi mustwo "Mischmasch" z Budyšina za sebje. Přichodny tydźeń pokročuje tura w Pančicach-Kukowje.


Sport: Semifinalaj za Supercup wulosowali

Na kromje wčerawšeho turněra je młodźinska redakcija semifinalaj 3. Serbskeho Supercupa wulosowała. Sokoł Ralbicy/Hórki hraje přećiwo Marijinej Hwězdźe a mustwo SJ Chrósćicy přećiwo koparjam z Njebjelčic. Losowej soninje běštaj nawodnica lětušeho turněra, sudniča Lea Krječmarjec a zapósłanc krajneho sejma, Alojs Mikławšk. Serbski Supercup wotměje so njedźelu w Njebjelčicach.

posledni raz aktualizowane: 16. pražnika 2019, 08:20 hodź.