Powěsće: póndźelu, 29.03.2021
Hauptinhalt
30. nalětnika 2021, 08:26 hodź.
Korona: Ličby stupaja a wobmjezowanja so přiwótřa
W Budyskim wokrjesu je było sobotu 107 a wčera 89 dalšich nowoinfekcijow na koronu, dwaj pacientaj - 51 a 63 lět - staj zemrěłoj. Na wčerawšej njedźeli bu jako sydomdnjowska incidenca 156 wozjewjena - 20 wjace hač sobotu. Škitne prawidła we wokrjesu so wot wutory zaso přiwótřa. To rěka mjez druhim, zo płaća zaso wobmjezowanja dom wopušćić, jedna domjacnosć smě so jenož z jednej dalšej wosobu zetkać, a zwěrjency a muzeje zaso začinja. KWe wokrjesu Zhorjelc je incidenca wčera na 201 rozrostła, tam wostanu wot dźensnišeho tež pěstowarnje zawrjene.
Budyski wokrjes: Předšulske přepytowanja so dlija
Předšulske přepytowanja šulskich nowačkow so lětsa dlija. Normalnje bychu so za šulske lěto 2021/22 w zašłej nazymje přewjedli. Buchu pak w Budyskim wokrjesu loni na spočatku druheje koronoweje žołmy přetorhnjene. Za to zamołwity wokrjesny personal dyrbješe korony dla druhdźe wupomhać. Krajnoradny zarjad Budyšin na naprašowanje zdźěli, zo budu so předšulske přepytowanja tež lětsa za kóžde dźěćo přewjesć móc, najskerje pak so hač do junija ćahnu.
Budyšin: Přednošk serbskeho wandrowca wuspěšny
Na digitalnym přednošku wandrowca Franca Čornaka su na platformje schadźowanka.de sobotu wječor wjace hač 300 wopytowarjow naličili. Młody Chróšćan rozprawješe tam połdra hodźiny wo swojim dyrdomdeju a pokaza na 130 fotow. Přednošk so tež simultanje do němčiny přełoži. Na samsnym dnju tróšku zašo je Radworska staršiska inciatiwa na tutej platformje ze 30 zajimcami jutrowne wěncy w formje jejka pasliło. Strona schadźowanka.de so wot Załožby za serbski lud wobhospodarja.
Budyšin: Hwězdarnja ponowjena
Saněrowanje Budyskeje hwězdarnje je zakónčene. Mjez druhim bu foyer přestworjeny a z konferencnymi meblemi wuhotowany, zdźěli Budyski měšćanski zawod BBB. Tak móže so foyer nětko tež za zarjadowanja lěpje wužiwać. Wonka bu wulki areal za skupiny k sedźenju wutworjeny. Tuchwilu zestajeja zhromadnje ze spěchowanskim towarstwom poskitki za projektowe dny, ekskursije a zwonkašulsku wučbu, rjekny rěčnica BBB. Ručež je wotwidźeć, hdy smědźa zaso wočinić, móža so zajimcy za tute zarjadowanja přizjewić.
Wotrow: Křižowy puć młodźiny
We Wotrowje je so na wčerawšej njedźeli na 80 młodostnych na lětušim křižowym puću serbskeje dekanatneje młodźiny wobdźěliło. Moto rěkaše "Stwórba Boža". Pod hołym njebjom podachu so wot Wotrowskeho sportnišća ke kopcej a wróćo. Młodźinski dušepastyr Gabriš Nawka podźakowa so naposledk za wopokazanu disciplinu zhladujo na hygienske předpisy. Wot apryla wotměje so měsačnje nyšpor za dekanatnu młodźinu w Róžeńće. Prěni tajki budźe 17. apryla.
