Powěsće: srjedu, 31.03.2021

31. nalětnika 2021, 12:35 hodź.


Budyšin: Jutrowne procesiony dowolene

Křižerske procesiony su lětsa jutry dowolene. Na hygieniske koncepty je so wutoru wječor krajnoradny zarjad z nawodami procesionow dojednał. Kaž rjekny zastupowacy krajny rada Udo Witschas, njeńdźe při tutym rozsudźe wo někajku show abo turistiske zarjadowanje. Zakład za dojednanje twori hygieniski koncept, po kotrymž maja so mjez druhim wšitcy křižerjo sobotu testować dać. Dale njewozjewja so žane časy a čary procesionow, zo bychu so přihladowarjo wotdźerželi. W Budyskim wokrjesu je ličba inficěrowanych z koronu nadal wysoka - tydźenska incidenca leži pola 169. W Zhorjelskim wokrjesu je incidenca dale nad 200, konkretnje 212. Tam mjeztym zaso wojacy při telefonowanju za kontaktnymi wosobami wupomhaja.


Budyšin: Najlěpše jejkadebjerki wuzwolene

Jury je dobyćerjow lětušeho wubědźowanja wo najrjeńše serbske jutrowne jejko wuzwoliła. W šěsć kategorijach je so dohromady 67 kolekcijow hódnoćiło. Dobyćerki rěkaja: Marja Domašcyna z Kanec, Sylke Roßbach-Schreierowa z Choćebuza, Bettina Borcherdingowa z Rahdena, Ines Trenschelowa z Allendorfa, Carola Stauberowa z Berlina a Edeltraud Gründelowa z Wojerec. To zdźěli čłonka Spěchowanskeho kruha za serbsku ludowu kulturu, Weronika Suchowa. Dobyćerske kolekcije wustajeja so wot jutřišeho zeleneho štwórtka w Serbskim muzeju w Budyšinje znajmjeńša hač do młodych jutrow. Dźěći móža swoje kolekcije hišće hač do srjedy po jutrach wotedać.


Wojerecy: Chcedźa zhromadnje dźěłać

Město Wojerecy chce z wokolnymi gmejnami hišće wušo zhromadnje dźěłać. Tak su wčera wotpowědne zrěčenje podpisali, rěkaše na posedźenju měšćanskeje rady. Hłownje dźe wo dołhodobny zhromadny wutwar industrijoweho parka Čorna Pumpa, kiž ma so z pomocu gmejnow Gródk a Sprjewiny Doł dale wuwić. Dale rěčeše so na posedźenju wo prěnich projektach z pomocu pjenjez, kiž steja za strukturnu změnu k dispoziciji. Mjez druhim dyrbi so z nich sociokulturny centrum "Ossi" modernizować.


Budyšin: Nowostka w knižnych polcach

W Ludowym nakładnistwje Domowina je nowy wobrazowy zwjazk Jutty Mirtschinoweje wušoł. W publikaciji z titulom „Malerei Grafik Buch Illustration Plakat Theater" předstaji so tworjenje Mirtschinoweje z lěta 1974 hač do dźensnišeho, tak zamołwita za Marketing LND Měrka Mětowa. Wulka je při tym ličba dźěłow za Łužiske kulturne institucije we nich: ilustracije za knihi, knižne protyki a časopisy LND, wobrazy we wuměłskich zběrkach Budyskeho Serbskeho muzeja a Choćebuskeho Dieselkraftwerk kaž tež figuriny a jewišćowe prospekty za Němsko-Serbske ludowe dźiwadło a mnohe plakaty wosebje za Piccolo dźiwadło w Choćebuzu. Nimo Mirtschinoweje biografije a bibliografije wobsahuje wobrazowy zwjazk tež zapisaj jeje twórbow a wustajeńcow.


Budyski wokrjes: Informuja sportowe towarstwa

Wokrjesny sportowy zwjazk Budyšin je na swojich internetowych stronach rubriku "Fit za nowy start" wutworił. W njej steja za sportowe towarstwa informacije k temam prawo, hygiena abo kubłanje. Tak na přikład tež treningowe wideja Jednoty Kamjenc, w kotrychž su tež serbscy koparjo sobu skutkowali, abo zwučowanska kampagna MSV Budyšin, najwjetšeho sportoweho towarstwa we wokrjesu Budyšin. Tež móžnosće dalekubłanjow na najwšelakorišich sportowych polach so w rubrice "Fit za nowy start" poskićeja.