Powěsće: štwórtk, 01.04.2021
Hauptinhalt
01. jutrownika 2021, 13:15 hodź.
Budyšin: Kelko infekcijow na kubłanišćach?
W Budyskim wokrjesu su srjedu 157 nowych infekcijow z koronawirusom zwěsćili. Tydźenska incidenca leži po žórłach RKI pola 135. To je něšto mjenje hač dźeń prjedy. Nimo toho wozjewi Budyski krajnorjadny zarjad statistiku z ličbami infekcijow na kubłanišćach we wokrjesu. Tak naličichu w pěstowarnjach a zakładnych šulach w zašłych tydźenjach 165 inficěrowanych - dalšich 116 pozitiwnych padow mějachu na wyšich šulach a gymnazijach.
Hornja Łužica: Mjenje bjezdźěłnych
W Hornjej Łužicy bě w měrcu mjenje bjezdźěłnych. To zdźěli agentura za dźěło w Budyšinje. Cyłkownje je tuchwilu něhdźe 19.600 ludźi bjez dźěła - 251 mjenje hač we februaru. Přirunujo z měrcom zašłeho lěta pak je ličba bjezdźěłnych w Hornjej Łužicy wo 12 procentow stupała. Tuchwilna kwota bjezdźěłnosće leži aktualnje pola 7 procentow.
Łužiska jězorina: Start sezony w meji
Kolesowarska šćežka wokoło Rańskeho jězora w južnej Braniborskej ma kónc meje hotowa być. To zdźěli rěčnik Zaměroweho zwjazka Łužiskeje jězoriny. Wot spočatka měrca twarja na juhozapadnym přibrjóze posledni, tři kilometry dołhi wotrězk. Nastanje tam tři metry šěroka asfaltowana kolesowarska šćežka. Při Sedlišćanskim jězorje ma 40 prózdninskich domčkow nastać. W meji chcedźa potom we Łužiskej jězorinje do sezony startować.
Domowina: Pytaja motiwatorow
Domowina je wupisała dźěłowej městnje za motiwatorow za tworjenje serbskich rěčnych rumow. „Motiwator je wosoba, kiž wožiwja a skruća rěčne rumy a serbsku identitu w kónčinach, hdźež je so serbšćina ze wšědneho dnja zhubiła" pisa Domowina w nowinarskim wozjewjenju. Po pozitiwnych nazhonjenjach w Budyskej župje ma nětko tež w regionomaj wokoło Wojerec a Slepoho tajki motiwator skutkować. Wšitke informacije k požadanju namakaja zajimcy na internetowej stronje Domowiny.
Zeleny štwórtk: Haja dojutrowne tradicije
Dźensa na Zelenym štwórtku haja so w Serbach dojutrowne tradicije. W Rownom wobrubja Rowniske glosy dwurěčnu pasiónsku nutrnosć, kiž změje serbski synodala Manfred Hermaš. We Wotrowje a Chrósćicach wobrubi Serbski ludowy ansambl Božu mšu k wopominanju poslednjeje wječerje. Tež wosebite pječwa, tak mjenowane kmótřiske całty na Zeleny štwórtk, su w zwučenym mnóstwje pola serbskich pjekarjow skazane. A w Rakecach pola Brězanec maja lětsa nowe pječwo z dołhej tradiciju w sortimenće. Je to mužik z ćěsta, kiž wobjima jejko. Tak mjenowany jejkacy mužik běše pozdatnje něhdy raz woblubowany kmótřiski darik na wsach we Łužiskich horach.
