Powěsće: wutoru, 06.04.2021
Hauptinhalt
06. jutrownika 2021, 14:45 hodź.
Jutry: 999 křižerjow po puću
Na lětušej jutrónčce je w serbskich procesionach dohromady 999 křižerjow wjesołu powěsć do přichodneje wosady njesło. To je pandemije a konjaceho herpesa dla nimale 500 mjenje hač před dwěmaj lětomaj. Mjez křižerjemi bě 6 złotych a 19 slěbornych jubilarow, dr. Pětr Brězan ze Sulšec je lětsa k 75. razej jěchał. Nowačkow bě w křižerskich procesionach lětsa 55. Dźakna boža mša křižerjow w Róžeńće njebudźe - za to pak decentralne we wotpowědnych wosadach. Tež w ewangelskich kónčinach je so po tradiciji jutrowna powěsć wozjewiła, tak na přikład we Wuježku. Na tamnišu rańšu dwurěčnu nutrnosć je na 30 ludźi přichwatało. Hinak hač w předchadźacych lětach pak njejsu zetkanje ze zhromadnej snědanju zakónčili.
Korona: Aktualny staw
W Hornjej Łužicy smědźa wot wutory zaso wobchody, zwěrjency a botaniske zahrody, muzeje, galerije a wopomnišća swoje durje wotewrić - ale jenož po knihowanju termina do wopyta a za wosoby, kiž móža aktualny test z negatiwnym wuslědkom předpołožić. Tež indiwidualny sport pod hołym njebjom je za jednotliwcow a w porikach zaso móžny, za dźěći a młodostnych hač do 18 lět tež w skupinach hač do 20 wobdźělnikow. To płaći najprjedy raz hač do 18. apryla, a jenož, dołhož je w sakskich chorownjach mjenje hač 1.300 łožow wobsadźene. W Budyskim wokrjesu lěkuje so tuchwilu 65 koronowych pacientow stacionarnje, w Zhorjelskim je jich 94. Za dalewobstaće wolóženjow roszudna ličba pacientow w cyłej Sakskej leži wokomiknje pola 1.019.
Ratarstwo: Burja a aktualna sezona
Dla sucheho lońšeho lěta liči Domanic ratarski zawod w Hózku lětsa ze špatnišimi žnjemi hromaka. Tež zymne nocy běchu hromakej na škodu. Tuchwilu sadźeja w Hózku sadźenki zeleniny, mjez druhim kwětak, kulirabij, kórki, tomaty kaž tež běły a čerwjeny kał. Burja su ze schadźenjom nalětnjeho wusywa spokojom, zyma njeje žanu wulku škodu nadźěłała. Kaž praji nam ratar Roman Wjesela z Chrósćic, dyrbjachu włóžneje pódy dla z nalětnim wusywom zdźěla čakać. Po tym, zo su wows a žonop kaž tež nalětnja rožka a ječmjeń wusyte, sćěhuje nětko mjez druhim kukurica.
Hornja Łužica: Kolesowarska kónčina
Hornja Łužica ma być kolesowarska kónčina. To přeje sej marketingowa towaršnosć Hornja Łužica-Delnja Šleska. Hišće lětsa chcedźa wot Němskeho kolesowarskeho zwjazka wotpowědnu certifikaciju dóstać. Kaž praji jednaćel marketingoweje towaršnosće, Olaf Franke, je Hornja Łužica hladajo na turistiske zajimawostki a kolesowarsku infrastrukturu najzajimawša kónčina Němskeje. Cil je, so na turistikich wikach sylnišo prezentować a wopytowarjow přiwabjeć.
Korona: Šćěpjenja pola domjacych lěkarjow
Wot srjedy so w někotrych lěkarskich praksach přećiwo koronje šćěpi. Tak na přikład tež w Ralbicach w praksy Dr. Jahnyja. Hižo wutoru wot wosmich móža sej zajimcy telefonisce termin skazać. Při tym pak měł so slěd priority šćěpjenja dodźeržeć. Tež dr. Jana Markowa w Njeswačidle wot srjedy pacientow šćěpi. Terminy za tutón tydźeń pak su hižo rozdawane.
