Powěsće: srjedu, 07.04.2021
Hauptinhalt
08. jutrownika 2021, 11:30 hodź.
Kubłanje: Ličby šulerjow 5. lětnikow
Ličba šulerjow 5. lětnikow na Serbskich wyšich šulach a na Serbskim gymnaziju druhe lěto zasobu stupa. Budźe to w přichodnym šulskim lěće dohromady 181 - 20 wjace hač loni. Po informacijach z Krajneho zarjada za šulu a kubłanje je so najwjace šulerjow za Serbski gymnazij Budyšin přizjewiło - 57. Najmjenje za Serbsku wyšu šulu Ralbicy - 19. We Worklecach chce 37 šulerjow wuknyć, w Radworju 39 a na Serbskej wyšej šuli Budyšin 29. Cyłkownej ličbje přidruži so hišće 21 šulerjow w Slepom a sydom w Kulowje, kiž chcedźa tam wot 5. lětnika po 2+modelu serbsce wuknyć. Změny su hišće móžne, wosebje dla přiwzaća na gymnazij. Doskónčny rozsud zhonja starši 11. junija.
Korona: Samotesty na šulach
Krajny zarjad za šulu a kubłanje Swobodneho stata Sakskeje chce po jutrownych prózdninach tež we wokrjesomaj Budyšin a Zhorjelc nimale wšitke šule ze srědkami za samotestowanje šulerstwa a wučerstwa zastarać. Hač do štwórtka maja so dalše z cyłkownje 410.000 samotestow do kubłanišćow dodawać. W tydźenjomaj do jutrow dyrbjachu sej šulscy nawodźa pakćiki w Budyšinje w Krajnym zarjedźe za šulu a kubłanje sami wotewzać. Přichodnu póndźelu smědźa šulerki a šulerjo w dźělenych skupinach zaso do šulow, jeli su negatiwnje testowani.
Kultura: Nowinki ze Serbskeho muzeja
Serbski muzej w Budyšinje swoje durje po aktualnym stawje hakle wot 20. apryla zaso wotewri. To praji nawodnica domu, Christina Boguszowa, na naprašowanje. Jeli-zo je incidenca pře wysoka, potom so wotewrjenje na spočatk meje přesunje. Hač do kónca meje je w Serbskim muzeju mjezynarodna wustajeńca „Barby daliny. Moler Ante Trstenjak a Łužiscy Serbja" widźeć. Tež dobyćerske kolekcije najrjeńšich jutrownych jejkow budu z wotewrjenjom muzeja w dźěćacym kabineće we witrinach wustajene, tak Boguszowa.
Hornja Łužica: Ličba schorjenych
W chorownjach Budyskeho wokrjesa lěkuje so tuchwilu 76 na koronu schorjenych, w Zhorjelskim so 106 pacientow stacionarnje zastaruje. Z tym je so ličba wobsadźenych łožow w Hornjej łužicy wot wutory wo 23 powyšiła. To je wjace, hač w cyłej Sakskej dohromady (18), dokelž so ličba w někotrych wokrjesach porno tomu zniži. W dwurěčnych wjeskach mjez Kamjencom a Budyšinom je tuchwilu najmjenje natyknjenych z koronowym wirusom w cyłym Budyskim wokrjesu. W Pančičanskej gmejnje na přikład nimaja tuchwilu ani jenički pad. We Worklečanskej, Njebjelčanskej a Bóšičanskej gmejnje registruja jeničkeho schorjeneho. Cyle hinak wupada w někotrych gmejnach wuchodnje Budyšina. W Bukečanskej maja na přikład 32 schorjenych.
Sport: Hrajna doba dočasnje zakónčena
Koparski zwjazk Hornja Łužica, w kotrymž hraja tež koparske mustwa sportoweho towarstwa Lok Slepo, je hrajnu dobu 2020/2021 dočasnje zakónčił. Čłonojo předsydstwa wopodstatnichu rozsud z tym, zo njehodźi so po podlěšenym lockdownje w času wot 19. apryla do 30. junija prěnje koło aktualneje sezony dohrać. Žana stafla njezměje wokrjesneho mištra, žane mustwo njepostupi a njezestupi. Předsydstwo Zapadołužiskeho koparskeho zwjazka, w kotrymž hraja mjez druhim mustwa serbskich sportowych jednotkow a towarstwow z Njebjelčic, Chrósćic, Pančic-Kukowa a Ralbic, so hišće rozsudźiło njeje.
