Powěsće: póndźelu, 07.06.2021
Hauptinhalt
07. smažnika 2021, 10:02 hodź.
100 lět znowazałoženja biskopstwa: Serbski podźěl
Za 100.róčnicu znowazałoženja Drježdźansko-Mišnjanskeho biskopstwa stara so Serbska kulturna brigada wo serbskorěčny podźěl. Tak su nowu biskopstwowu hymnu serbsce w Budyšinje natočili. Z njej budu dźěl wulkeho digitalneho biskopstwoweho chóra, kotryž wustupi we wideju němsce a serbsce wotměnjejo na swjedźenskich kemšach w Drježdźanach 20.junija. Tekst je Beno Budar zeserbšćił. Kwartet brigady jubilejne kemše 20.junija na městnje w katedrali w Drježdźanach sobu wuhotuje - z dźělemi noweho oratorija Tomaša Kole "Běchmy-smy-budźemy", na tekst wot młodostnych ze serbskich wosadow. Prapremjera oratorija dyrbješe so korony dla na klětu přesunyć.
Budyšin: NSLDź zaso před publikumom hraje
Kónc tydźenja je Němsko-Serbske ludowe dźiwadło Budyšin swoju "Hrajnu dobu pod hołym njebjom" zahajiło. Na zahrodźe pódla hłowneho doma mějachu dwě premjerje klankodźiwadła. Lěćne dźiwadło wokoło Sherlocka Holmesa změje 24. junija premjeru, za čož runje z wotmachom zwučuja. Tuchwilu dźiwadło pruwuje, hač móža serbsko-němsku inscenaciju Serbskeho młodźinskeho dźiwadła "Prěki - Durich - Loborka" hišće w juliju pokazać. Je to ćežko, dokelž tójšto młodostnych z wjacorych šulow sobu skutkuje. Hewak stej přichodnej serbskej inscenaciji "Dołhož fenki běža" a "Čmjeła Hana" hakle zaso w septembrje.
Studenća: Towarstwo Bjarnat Krawc pyta nowy logo
Drježdźanske serbske studentske towarstwo Bjarnat Krawc pyta dale za nowym logom. Po nimale měsacu njeje so ani hišće jenički namjet wotwonka zapodał. Ze swójskich rjadow pak maja hižo někotre namjety, praji čłonka towarstwa, Patricija Kralec. Nowy logo chcedźa mjez druhim na měški ćišćeć, kotrež dóstanu nowi studenća a nowe studentki w Drježdźanach za lětuši zymski semester. Namjety za nowy logo towarstwa zběraja hišće hač do 18.junija a mytuja najlěpši ze 100 eurami.
Dźěwin: Gmejna liči z dochodami
Za wočerstwjenišćo při lěsnym jězoru w Dźěwinje płaća wot 1. julija hinaše płaćizny. Zwyšić ma so popłatk za parkowanje. Tole su gmejnscy radźićeljo na swojim zašłym posedźenju wobzamknyli. Konstantny wostawa popłatk za wotnajenje bungalowow. Přez nowe postajenja liči gmejna Dźěwin lětsa z něhdźe 21.000 eurow dochodami z wočerstwjenskeje kónčiny.
Korona: Aktualne wuwića
Tydźenska incidenca w Budyskim wokrjesu leži póndźelu rano pola 36 - w Zhorjelskim wokrjesu pola 21. Dokelž je dźensa zaso pod 50, so wot srjedy wolóženja dowola: Šule a pěstowarnje zaso normalnje wočinja, we domskich móže so 10 wosobow z dweju domjacnosćow zetkać. Gastronomija smě zaso nutřka posłužować - hdyž so kontaktne daty a dnjowoaktualny test podadźa. Pod samsnymi wuměnjenjemi su potom zaso turistiske přenocowanja móžne, kwasy z 50 hosćimi a sport nutřka z 30-ćomi.
