Powěsće: srjedu, 09.06.2021
Hauptinhalt
09. smažnika 2021, 09:21 hodź.
Zastaranje: Dźensa rano žana woda w gmejnje Radwor
Radworska a zdźěla tež Njeswačanska gmejna nimatej na dźensnišej srjedźe twarskich dźěłow dla pitnu wodu z honača. Na to skedźbnja wokrjesne zawody Budyšin. Radworska šula na přikład dóstanje dźensa sudy z pitnej wodu ze Zdźěrje. Serbski katolski dźěćacy dom "Alojs Andricki" dóstanje wodu w sudobjach z Budyskeje wodarnje. We woběmaj padomaj so tanki direktnje na internu wodowu syć domskeju přizamknjetej a hodźitej so zaso napjelnić.
Korona: Što je wšitko dowolene?
W Budyskim wokrjesu zběhnu so wot dźensnišeje srjedy dalše škitne naprawy korony dla: na přikład su šule a pěstowarnje zaso normalnje wočinjene, w hosćencach smě so zaso nutřka posłužować. Tež sportowcy zaso w hali trenuja. To potrjechi wosebje blidotenistow a wolejbulistow serbskich sportowych towarstwow kaž tež šulski sport. Trjeba pak je w sportowych towarstwach njehladajo toho dnjowoaktualny test. A to budźe za wjetšinu sportowcow zadźěwk, wšako dyrbjeli sej před kóždym treningom test kupić, so testować dać abo aktualny test předpołožić. Při wšěm pak běža hižo přihoty na přikład za Radworskich blidotenistow. Na nowy tydźeń chcedźa w Slaviji zaso zwučować, praji předsyda tamnišeho sportoweho towarstwa Ingo Adam. Aktualna incidenca po ličbach RKI je w Budyskim wokrjesu pola 31, w Zhorjelskim pola 16.
Njeswačidło: Z posedźenja gmejnskeje rady
W Njeswačidle so k 1.awgustej gmejnska biblioteka rozpušći. Wjesnjanosta Gerd Schuster mjenowaše gmejnskej radźe wutoru dwě přičinje. Sprěnja sej tuchwilu jenož hišće něhdźe 20 wosobow hdys a hdys knihu wupožča. Zdruha ma so nuznje hort zakładneje šule rozšěrić. Tutón móhł potom tuchwilnu biblioteku sobu wužiwać. Wot nazymy trjebaja w Njeswačidle něhdźe 100 hortowych městnow – tuchwilna kapacita pak leži pola jenož 87. Gmejnska rada namjet wutoru jednohłósnje přiwza.
Drježdźany: Serbja w stolicy z pisanym programom
Drježdźanske towarstwo "Stup dale" je za přichodne měsacy wotměnjawy program přihotowało. Jako prěnje planuja kónc měsaca "Šulu w zelenym": zo so šulerjo "AG serbšćiny" po dołhej onlinowej wučbje zaso raz woprawdźe zetkaja, a to na zahrodźe. Dale chcedźa sej w lěću Spěwny consorcium seniorow na koncert přeprosyć, domchowanku swjećić a swójbny wulět do Krabatoweho młyna w Čornym Chołmcu přewjesć. Za nazymu je přewidźane pućowanje na slědach Serbow w Radebeulu a piknik z pušćenjom zmijow. Towarstwo wobsteji lětsa 10 lět - dla pandemije njejsu to swjećić móhli.
Wodowe Hendrichecy: Dosć městna w prózdninskim lěhwje
Na serbske rěčne prózdniske lěhwo we Wodowych Hendrichecach móža nětko tola wšitke dźěći sobu jěć, kotřiž su so přizjewili. Kaž koordinatorka Serbskeho šulskeho towarstwa Marlis Młynkowa wutoru na naprašowanje praji, su z mějićelom Querxenlanda dalše městna na ležownosći namakali, hdźež móža šulerki a šulerjo přenocować. Z tym je čakanska lisćina prózdna a wšitke 91 dźěći móže so na lěhwje we wulkich prózdninach wobdźělić.
