Powěsće: štwórtk, 10.06.2021
Hauptinhalt
10. smažnika 2021, 09:13 hodź.
Lubin: Kralowski puć so wotewri
Kralowski puć wokoło Lubina je so srjedu oficialnje wotewrił. Z tym přepodaštaj Heroldec mandźelskaj gmejnje na kołopuću stejace šěsć zornowcowych stelow, do kotrychž je sydom wobličow serbskich kralow zadypane. Přidatnje steji na kamjentnej tafli serbsce a němsce powědka wo sydom serbskich kralach, kotriž su po legendźe w bitwje přećiwo Němcam padnyli a kotřiž buchu na Lubinje pochowani. Gmejna chce so nětko wo to postarać, zo dóstanje Kralowski puć dwurěčne turistiske taflički a dalše informacije wokoło Lubina.
Pančicy-Kukow: Wustajeńca wo serbskich drastach so wotewri
Wustajeńca wo wašnjach a wo serbskej drasće so njedźelu w Pančicach wotewri. Za nju njeje Monika Cyžowa z Noweje Jaseńcy jenož fota wupytała, ale tež na 50 klankow w štyrjoch hišće žiwych drastowych wariantach zdrasćiła, kaž wčera na naprašowanje zdźěli. Wustajeńca w rumnosćach zežiwjenskeje a zeloweje zahrody klóštra Marijina Hwězda je drje hižo měsac widźeć, pandemije dla pak so hakle njedźelu wotewri. Po tym Monika Cyžowa po přehladce serbskeje drasty powjedźe.
Worklecy: Dnjowa hladarnja hotowa
We Worklecach je so něhdyša kupnica přetwariła na dom za serbske dnjowe hladanje Hornjołužiskeho zwjazka Carity. Po něšto wjac hač jednym lěće su twarske dźěła nětko tak daloko wotzamknjene, praji přichodna wjednica Jěwa Šnajderowa na naprašowanje. Wot 1. julija změja tam 18 městnow za dnjowe hladanje starych a chorych. Zajimcy su 18. junija na dźeń wotewrjenych duri do Worklec přeprošeni.
Zhorjelc: Łužiska filmowa akademija
Prěni króć wotměje so w juliju lěćna filmowa akademija Łužica, a to w Zhorjelcu. Dwutydźenska dźěłarnička je wusměrjena na młode talenty wot 18 lět, kiž chcedźa so při filmowanju wuspytać a wukmanjeć. Nimo toho su wjacore rozmołwne koła a kulturne přinoški planowane. Projekt podpěruje so mjez druhim wot serbsko-němskeje syće Łužycafilm. Pod www.sommerfilmakademie.org móža so zajimcy přizjewić.
Delni Wujězd: Před wulkimaj jubilejomaj
Kónc awgusta woswjeći Muske spěwarske towarstwo w Delnim Wujězdźe swój 140. jubilej wobstaća a 120. róčnicu załoženja towarstwa "ZAHRODKA". Tole zdźěli nam zastupowacy předsyda Siegmar Schmidt. Jeli to aktualne wuwiće nastupajo koronowu pandemiju dowoli, zetkaja so chóry z Łaza, Hamora, Mužakowa, Rózborka a Dubca pod hołym njebjom w Ludowym parku w Delnim Wujězdźe. Planowane je tež wobdźělenje serbskeho chóra a kapały Horjany z Chrósćic. Na zetkanju chórow 29. awgusta zaspěwa 20 muži hosćićelskeho chóra tež někotre serbske ludowe spěwy. Nawoda Wolfgang Frister skutkowaše wjele lět w Serbskim ludowym ansamblu w Budyšinje.
