Powěsće: pjatk, 12.06.2021
Hauptinhalt
12. smažnika 2021, 07:42 hodź.
Wobsah artikla:
- Budyšin/Slepo: Wjele towarstwow bjez wustawkow za delegowanje na hłownu zhromadźiznu Domowiny
- Łužica: Pruwowanja w serbšćinje su nimo
- Wojerecy: "Łužiska komisija" załožena
- Budyšin: Problem hołbjow při Starej wodarni
- Kamjenc: Wobydlerski etat schwaleny
- Pančicy-Kukow/Worklecy: Wolejbulowe mustwo so rozpušćiło
Budyšin/Slepo: Wjele towarstwow bjez wustawkow za delegowanje na hłownu zhromadźiznu Domowiny
We wustawkach wjacorych Domowinje přisłušacych towarstwow njeje rjadowane, kak maja so delegaća na hłownu zhromadźiznu třěšneho zwjazka zwołać. Po rešeršach Serbskeho rozhłosa potrjechi to mjez druhim Serbske šulske towarstwo, Spěchowanske towarstwo Serbski muzej Choćebuz, Maćicu Serbsku, Serbski kulturny turizm kaž tež młodźinske towarstwo PAWK. Nastała je dla delegowanja diskusija, dokelž su někotři čłonojo Domowinje přisłušacych towarstwow, kotřiž su zdobom z čłonom skupiny Serbski sejm, kritizowali, zo njeje so pasiwne wólbne prawo znajmjeńša podźělnje přesadźić móhło. Na jutřišej soboće je hłowna a wólbna zhromadźizna Domowiny w Slepom.
Łužica: Pruwowanja w serbšćinje su nimo
Pruwowanja w serbšćinje su na Serbskim gymnaziju w Budyšinje kaž tež na serbskich wyšich šulach na wsach w předmjeće "serbšćina" zakónčene. Na niwowje a wobjimje pisomnych a ertnych pruwowanjow njeje so lětsa we hłownym ničo změniło, hač na to, zo je so na pisanje swójskeho teksta na zakładźe wědomostnych materialijow spušćiło - tak kaž za němskich šulerjow w němčinje. Lěpšina na gymnaziju za maturantow bě, zo su so w přihotowanskim času jeničce na předmjety koncentrować dyrbjeli, kotrež so pruwuja. Wučbnu maćiznu a znamki za wšitke dalše předmjety nachwataja šulerjo nětko hač do kónca šulskeho lěta.
Wojerecy: "Łužiska komisija" załožena
We Wojerecach bu štwórtk "Łužiska komisija" załožena. Wona dyrbi strukturnu změnu w regionje přewodźeć a dohladować, zo so spěchowanske srědki tam zasadźuja, hdźež su woprawdźe trěbne. Gremijej přisłušeja wjesnjanosća a zastupnicy zwjazkow a hospodarskich initiatiwow z Łužicy. "Łužiska komisija" přewza dźěło "Wuhloweje komisije", kotraž je štwórtk formalnje swoje dźěło zakónčiła a kotraž je strukturnu změnu dotal přihotowała.
Budyšin: Problem hołbjow při Starej wodarni
W Budyšinje su fachowcy tutón tydźeń Staru wodarnju přepytowali. Wo tym informuje měšćanski zarjad na naprašowanje. Z pomocu krana su sej specialisća fasadu za planowane saněrowanske dźěła wobhladali. Při Starej wodarni při Michałskej cyrkwi maja wjetši problem z hołbjemi a fachowcy dyrbja nětko za pućemi pytać, kak hodźi so při ponowjenju wěže přirodoškit dodźeržeć.
Kamjenc: Wobydlerski etat schwaleny
Z wobydlerskeho etata města Kamjenc ma so wosom naprawow zrealizować. Wo tym je tamniša měšćanska rada na swojim zašłym posedźenju wuradźowała a projekty jednohłósnje wobzamknyła. Mjez druhim maja so w nutřkownym měsće w Kamjencu nastroje za sportowanje natwarić. Boršć, kotraž lětsa znowa wupadnje, dóstanje přidatne papjerniki a na Pastwinej horje maja so informaciske tafle připrawić. Za wuchodny dźěl Kamjenca pyta měšćanski zarjad hišće za idejemi wobydlerjow, kotre projekty hodźeli so tam zwoprawdźić.
Pančicy-Kukow/Worklecy: Wolejbulowe mustwo so rozpušćiło
Žónske wolejbulowe mustwo Hrajneho zjednoćenstwa Pančicy-Worklecy je so rozpušćiło. Wot noweje hrajneje doby hraja wolejbulistki w dwěmaj mustwomaj jenož hišće pod třěchu a mjenom Sportoweho towarstwa Viktorije Worklecy. Pančanki w towarstwje hižo žane žónske wolejbulowe mustwo njezměja. Z tym móža sej wobě mustwje mjez sobu z hrajerkami wupomhać, štož dotal dowolene njebě.
