Powěsće: sobotu, 12.06.2021
Hauptinhalt
12. smažnika 2021, 09:17 hodź.
Slepo: Hłowna a wólbna zhromadźizna Domowiny
Na dźensnišej 20. hłownej zhromadźiznje Domowiny woli so předsyda kaž tež nowe zwjazkowe předsydstwo. Za předsydu kandiduje znowa jako jenički Dawid Statnik, za městni městopředsydow Hartmut Leipner a Marko Hančik. Nimo nich chce dalšich 27 kandidatkow a kandidatow w zwjazkowym předsydstwje dźěłać. Na hłownu zhromadźiznu Domowiny w Slepom wočakuja na 150 ludźi - a to w Němsko-serbskim šulskim kompleksu. - Třěšny zwjazk ma po swójskich informacijach na 7500 čłonow w towarstwach a župach. Wjace k hłownej zhromadźiznje słyšiće w běhu wusyłanja.
Łužica: Dźěći móža na wuzwolenu serbsku šulu do 5. lětnika hić
Wšitke dźěći, kiž póńdu z nowym šulskim lětom na serbskich šulach do 5. lětnika, dóstanu tu šulu přizwolenu, kotruž su sej wupytali. To zdźěli wčera Krajny zarjad za šulu a kubłanje w Budyšinje. Přizwolenja su wotpósłane. Na Serbskim gymnaziju w Budyšinje nastanu tři rjadownje, na wyšej šuli we Worklecach a w Radworju dwě, w Ralbicach jedna. Tohorunja jednu rjadnownju wutworja na serbskej wyšej šuli w Budyšinje, byrnjež přiwza so tam 29 šulerjow. Tute wuwzaćne rjadowanje je so na šulskej konferency rozsudźiło.
Budyšin: Label „Sorbian Music“ załoženy
Nowy label „Sorbian Music“ je so załožił a poskića wotnětka na wšěch znatych streamingowych platformach wothrawanje serbskeje hudźby a dalšich awdijowych produkcijow, kotrež je Załožba za serbski lud hdy produkowała abo spěchowała. Su to wšelake žanry - wot klasiki přez rock a pop hač k słuchohram a bajkam.
Katharina Čornakowa, koordinatorka projekta, wjeseli so přez wozjewjenje a praji, zo so z projektom Sorbian Music lochki a moderny přistup k serbskim awdijam zmóžni, takrjec serbska hudźba ze zaka. Na internetowej stronje www.sorbian-music.net steji zestawa serbskich produkcijow, kotrež móže Załožba za serbski lud na streamingowe platformy stajić.
Chrósćicy: Chcedźa wjes porjeńšić
W Chrósćicach pokročuje inženjerski běrow z dźěłami za přetworjenje nawsy a "Cyrkwinskeje hory". Tamniši areal ma so z pomocu spěchowanskich srědkow a myta, kiž wudoby sej gmejna na lońšim wubědźowanju SIMUL+, porjeńšić a wutwarić. Kaž gmejnski zarjad informuje, předstaji přichodny štwórtk za to zamołwity inženjerski běrow swoje dalše kroki. K tomu su wšitcy wobydlerjo do wjacezaměroweje hale "Jednota" přeprošeni.
Radwor: Sportowe towarstwo z nowymi wustawkami
Radworske sportowe towarstwo (SJ 1922) je so wčera na nowe wustawki dojednało. Tute běchu w zašłych měsacach dźensnišim poměram přiměrili. Dale zaběraše so hłowna zhromadźizna z njedawnymi konfliktami w předsydstwje. Mjeztym pak je jedyn čłon towarstwo wopušćił, tak zo dotalne předsydstwo dale čini. Radworske sportowe towarstwo ma na 260 čłonow. To je nimale samsna ličba kaž do korony. Klětu w septembrje woswjeći towarstwo ze swjedźenskim tydźenjom swój 100. jubilej.
