Powěsće: póndźelu, 14.06.2021
Hauptinhalt
14. smažnika 2021, 09:23 hodź.
Slepo: Hłówna a wólbna Domowiny
Na 20. hłownej a wólbnej zhromadźiznje Domowiny bu sobotu Dawid Statnik znowa jako předsyda wuzwoleny - a to z 96 procentami. W nowym zwjazkowym předsydstwje dźěła nětko 30 ludźi. Mjez nimi je přirunujo ze zašłymi lětami wjele młodych ludźi. Wobsahowje je zhromadźizna dźěłowe směrnicy za dobu wot 2021 do 2023 z wjac hač 60 projektami a nadawkami třěšneho zwjazka wobzamknyła. Tež dołhodobnje we wšelakich gremijach dodiskutowany namjet změnow wustawkow su delegaća přiwzali. Z tym dóstanu čłonojo-jednotliwcy wjace prawow. Wjace wuslědkow 20. hłowneje a wólbneje zhromadźizny Domowiny namakaće na našej internetowej stronje.
Łužica: Aktualne wuwiće pandemije
W Hornjej Łužicy so wot dźensnišeho tójšto wolóži. Tole zmóžnja niske ličby koronowych infekcijow we wokrjesomaj Zhorjelc a Budyšin. Tak smě so zaso bjez testa nakupować a kupjele móža so wopytować. Na kwasach a pohrjebach smě so 50 ludźi wobdźělić. Na šulach njetrjeba so hižo nahubnik nosyć. Gastronomojo njetrjebaja při wonkownym posłužowanju wjac kontaktne daty zapisać. Jeničce tam ma so hišće negatiwny test pokazać, hdźež so wotstawki dodźeržeć njemóža - tak w sawnach a klubach. Tydźenska incidenca w Budyskim wokrjesu leži po statistice RKI pola 17 a w Zhorjelskim pola 7.
Hrodźišćo: Koncert po dołhej přestawce
W Hrodźišću pola Wósporka, w tamnišim hrodowym parku, je so njedźelu chórowy koncert Serbskeho ludoweho ansambla pod hołym njebjom wotměł. Bě to prěni wustup chóra jako cyłk po wosom měsacow trajacej přestawce korony dla. Program žněješe dobry wothłós a ansamblowcy běchu wosebje z jara dobrej akustiku na městnje spokojom, praji rěčnik Štefan Cuška. Hornjo- a delnjoserbske kompozicije wučinjachu hłowny dźěl koncerta. Tak zaklinčachu twórby Jurja Winarja, Jana Pawoła Nagela a Bjarnata Krawca kaž tež wot Serbskeho cyrkwinskeho organista a komponista Feliksa Brojera.
Budyšin: 17. čitanske wubědźowanje
Na lětušim čitanskim wubědźowanju Rěčneho centruma WITAJ je so sobotu 17 dźěći wobdźěliło - maćernorěčni a tajcy z 2plus-rjadownjow, nimale jenak wjele w kóždej skupinje. Přińdźechu z třećich lětnikow šulow z Worklec, Chrósćic, Ralbic, Radworja, Budyšina, Wojerec a Slepoho. Na žurli Serbskeho muzeja Budyšin předstajichu swoju najlubšu serbsku dźěćacu knihu a wurězk z njeje čitachu. Z maćernorěčnych je jury najbóle přeswědčił Józef Měrćink, kotryž chodźi do Chróšćanskeje šule, w skupinje 2plus Mirek Malink ze Slepoho.
Radwor: Cyrkwinski jubilej wotprajeny
W Radworju je so wjacednjowski wosadny swjedźeń „125 lět Radworska cyrkej“ wotprajił. Wón běše w septembrje planowany. Přičina je njewěste wuwiće pandemije w nazymje. To je zastupjer wosadneje rady wčera na kemšach zdźělił. Hač a na kotre wašnje so swjedźeń klětu nachwata, njeje hišće rozsudźene. Zdobom bu wčera wozjewjene, zo so w Radworju njewěsteje situacije dla lětsa tež žadyn nabožny tydźeń (RKW) njepřewjedźe.
Chrósćicy: Nowa sakska mišterka
Na 50 zapřahow z wjacorych Zwjazkowych krajow je so kónc tydźenja w Chrósćicach při pomniku wubědźowało. Zarjadowar turněra, konjace sportowe towarstwo "Při Klóšterskej wodźe", bě z wothłosom spokojom. Najdlěši puć do Chrósćic měješe zapřah z Nordrhein-Westfalskeje. Titul sakskeje mišterki pola ponijow dźěše na kóncu do Moritzburga. A lokalny matador Lukas Wenderoth wudoby sebi jedne třeće a jedne štwórte městno. Turněr w přezpólnym jěchanju planuja sportowcy potom srjedź septembra w Hórkach.
