Powěsće: wutoru, 15.06.2021
Hauptinhalt
15. smažnika 2021, 10:58 hodź.
Budyšin: Zetkanje biskopow a ekumeniske kemše
Mnozy wěriwi – katolscy a ewangelscy – wobdźělichu so póndźelu w Budyskej tachantskej cyrkwi na ekumeniskej Božej słužbje z wopomnjenjom swjateje křćeńcy. Ju swjećeštaj biskop Heinrich Timmerevers a jeho ewangelsko-lutherski sobubratr, krajny biskop Tobias Bilz z dalšimi duchownymi. Tachantski farar Wito Sćapan poda tež někotre zawodne słowa w serbskej rěči. Nimo toho běchu čitanje, próstwa kaž tež psalm serbsce słyšeć. Wopyty w Budyšinje a w přichodnych dnjach tež w Deutzenje a Mišnje wotměja so w přihoće wulkeho swjedźenja k 100. róčnicy znowazałoženja Drježdźansko-Mišnjanskeho biskopstwa přichodnu njedźelu, 20. junija.
Dźiwadło: Sherlock Holmes so hotuje
Wjace hač 13.500 kartkow je za lětuše lěćne dźiwadło hižo předate. To stej dwě třećinje cyłkowneho poskitka, praji intendant Lutz Hillmann póndźelu na nowinarskej konferency. Lětsa budźe tež gastronomija zawěsćena a přestawka je planowana při inscenaciji kołowokoło Sherlocka Holmesa. Nimo toho planuje so tež multimedialna wustajeńca k 25. róčnicy lěćneho dźiwadła, kiž budźe na wulkej žurli Dźiwadła na hrodźe widźeć.
Rakecy: Nowa marka "Łužiska ryba" so předstajiła
Marketingowe towarstwo Hornja Łužica-Delnja Šleska je, zhromadnje z fachowcami, nowu zwičnjensku strategiju za łužisku rybu wuwiło a póndźelu zjawnje předstajiło. Mjez druhim wuwi so nowy logo "Łužiska ryba", kotryž słuži jako spóznawanske znamjo za zawody, kiž maja wotpowědny certifikat. Wón wudawa so, nimo němskeje, tež w serbskej rěči. Projekt so wot Europskeje unije spěchuje.
Budyšin: Chcedźa oratorij "Hrodźišćo" natočić
Chór serbskeho gymnazija Budyšin chce oratorij "Hrodźišćo" wot Měrćina Weclicha natočić. Koncertaj za to stej planowanej 4. a 5. septembra w Budyskej Krónje. Chórowy nawoda Friedemann Böhme: "Brigada dyrbi zaso spěwać, ja chcu z młodostnymi zaso spěwać. Nowozapočatk je wulkotny projekt, mjenujcy tak, zo my wšitkich přeprosymy, kotřiž su "Hrodźišćo" spěwali, starych, najstaršich, a najmłódšich sobu wzamy - tak, zo móžemy štyri dny zhromadnje probować, potom je jedyn koncert, druhi koncert a z toho nastanje jedna CD." Proby budu bjezposrědnje do toho, posledni tydźeń prózdninow. Dalši zajimcy móža so hišće přizjewić.
Čorny Chołmc: Slědźerski projekt so předstajił
Měrćina Nowaka-Njechorńskeho wobdźěłanje stawizny Krabata je wote wšěch wobdźěłanjow najbóle w regionje a stawiznach Łužicy zakótwjene. To je jedyn z wuslědkow přepytowanja Hansa-Jürgena Schrötera a Susany Wuškoweje, kotrež kónc tydźenja w Čornym Chołmcu předstajištaj. Tak je Nowak-Njechorński na zakładźe Krabata Jurja Pilka sam dale wo wosobje a regionje slědźił a swoje wuslědki wuměłsce w swojej powědce přetworił. Zdobom móžeše Schröter při zaběrje z Čornym Chołmcom wotkryć, zo bě tamniša cyrkej do reformacije putniske městno.
