Powěsće: póndźelu, 13.09.2021
Hauptinhalt
14. požnjenca 2021, 00:38 hodź.
Chrósćicy: Popowa opera trójce předstajena
Wjace hač 1.200 ludźi je kónc tydźenja předstajenja serbskeje popoweje opery „Carpe Noctem - Njeskónčna nóc“ dožiwiło. Tak běchu wšitke tři předstajenja wupředate. Wukon 70 sobuskutkowacych na jewišću mytowaše publikum z dołho trajacym přikleskom. Póndźelu witaja šulerjow wyšich šulow a Serbskeho gymnazija na poslednje, šulerske předstajenje.
Stróža: Němsko-serbske přirodowe wiki
23. Němsko-serbske přirodowe wiki kónc tydźenja w Stróži pola Hućiny su njedźiwajcy pomjeńšeneje warianty wjace hač 4.000 wopytowarjow přiwabili. Zarjadowarjo wot Biosferoweho rezerwata hódnoća to jako wulki wuspěch - hladajo na to, zo dyrbjachu wiki trójce pandemije dla wupadnyć. Hosćom poskićachu rostliny, regionalne žiwidła a produkty domjacych rjemjeslnikow. Sobotu je Serbska rejowanska skupina Smjerdźaca wustupiła a njedźelu Serbski folklorny ansambl Slepo. Domizniske towarstwo Radiška je wiki podpěrało.
Zemicy-Tumicy: Na Mučinka spominali
Sobotu su w Zemicach-Tumicach na wučerja a Maćicarja Jana Bohuwěra Mučinka składnostnje jeho 200. posmjertnych narodnin spominali. Dopołdnja na kěrchowje porěčeštaj wjesnjanosta Jens Glowienka a předsydka Maćicy Serbskeje Anja Pohončowa. Na wječornym zarjadowanju poda Mučinkowy potomnik, awtor Thomas Gerlach, přehlad wo jeho žiwjenju a skutkowanju. Wječor wobrubichu šulerki, wubranka Chróšćanskeho cyrkwinskeho chóra a spěwar Hartmut Schulze-Gerlach, kotryž je tež potomnik Mučinka. Mučink bu w Serbach jako ludowy powědar znaty, skutkowaše w Zemicach-Tumicach jako prěni wučer tamnišeje šule a załoži pčołarske kaž tež ratarske towarstwo. Wopominanje bu organizowane wot gmejny Zemicy-Tumicy a towarstwa “Granitowa wjes” z podpěru Maćicy Serbskeje.
Hrubjelčicy: Serbski dworowy swjedźeń
Dworowy swjedźeń w Hrubjelčicach je sobotu něhdźe 60 ludźi wopytało. Někotři běchu do toho hižo zhromadnje pućowali - po puću sydom serbskich kralow na Lubinje. Ekumenisku nutrnosć na Jaworkec/Maćijec statoku je superintendent na wuměnku Jan Malink zhromadnje z tachantskim fararjom Witom Sćapanom swjećił. Při zhromadnej wječeri zaspěwa muska skupina "Přezpólni". Dworowy swjedźeń Serbskeho ewangelskeho towarstwa so prěni raz njeje we Wuježku wotměł kaž dotal, ale w Hrubjelčicach.
NSLDź: Serbska znowa-premjera "Dołhož fenki běža"
Sobotu wječor bě prěnje předstajenje noweje hrajneje doby Němsko-Serbskeho ludoweho dźiwadła. Po połdra lěće a z nowymaj hrajerkomaj je so serbska inscenacija “Dołhož fenki běža” derje přiwzała. Dźiwadło spušći lětsa na swoju nazymsku turneju po wjesnych žurlach a přeprošuje hač do srjedź oktobra na serbske předstajenja na hłownym jewišću do Budyšina.
Radwor: Dźeń wotewrjeneho pomnika w dwórnišću inkluzije
Na Dnju wotewrjeneho pomnika je so njedźelu tež Radworske dwórnišćo inkluzije předstajiło. W awgusće bu tam kuchnja dotwarjena, kiž je so z pomocu crowdfundingoweje akcije zapłaćiła. Nětko sćěhuja hišće dalše dźěła w ponowjenej čakarni, tam maja so drjewjane sćěny ponowić a sanitarne rumnosće dotwarić. W hornim poschodźe nastanu do klětušeho hišće bydlenja.
