Powěsće: štwórtk, 16.09.2021
Hauptinhalt
16. požnjenca 2021, 10:10 hodź.
Radwor: Plany za tamniši hród předstajene
Nowy wobsedźer Radworskeho hroda je srjedu prěni raz zjawnje swoje wizije předstajił. W Bayerskej rodźeny a w Berlinje bydlacy Florian Heilbronner chce so bórze do wsy přesydlić a na 300 lět stare twarjenje zaso po historiskim přikładźe saněrować. Po dotalnych planach, kotrež je gmejnskej radźe předstajił, měli dźěła něhdźe pjeć lět trać. Potom ma so hišće park přerjadować. Heilbronner je Radworski hród hakle před měsacami kupił. Kelko móhło jeho zdźerženje a wobnowjenje płaćić, so srjedu prajiło njeje.
Kamjenc: Posledni dźeń šćěpjenja
Šćěpjenski centrum w Kamjencu měješe srjedu posledni króć swoje durje wotewrjene. Kaž Němski čerwjeny křiž Sakska na naprašowanje zdźěli, bu wot spočatka januara do srjedy na 120.000 šćěpjenjow přewjedźene, při tym liča tež šćěpjenja přez mobilne teamy sobu. Mjez 600 a 700 dozow bu na dźeń přerěznje wudźělene. Mobilne teamy su w Budyskim wokrjesu dale po puću a Lubijski centrum je hišće hač do 21. septembra wotewrjeny.
Łaz: Z posedźenja gmejnskeje rady
Gmejna Łaz chce z krajneje pawšale 50.000 eurow za dźěła při rěčnišćach wužiwać. To su gmejnscy radźićeljo na swojim posedźenju wobzamknyli. Dalše 20.000 eurow je předwidźane za porjeńšenje wjacorych wjesnych dźělow. Mjez druhim ma so hrajkanišćo we Łazu rozšěrić, we Wulkich Ždźarach dóstanu w tamnišim parku desku za blidotenis a při Třižonjanskim jězorje ma so pawiljon porjeńšić. Hišće lětsa chcedźa z prěnimi naprawami započeć.
Nakładnistwo: Nowa protyka 2022 wušła
W Ludowym nakładnistwje Domowina je wušła Serbska protyka za lěto 2022. Kaž LND informuje, předstaji so w aktualnym wudaću wjes Minakał. Něhdy bě wjes srjedźišćo pobožnych Serbow a lětstotki pozdźišo sydło Centralneje serbskeje rěčneje šule, rěka k tomu w nowinskej zdźělence. W dalšich rubrikach předstaja so mjez druhim wulětowe cile po Hornjej Łužicy a Sakskej Šwicy. Knižna premjera budźe w poslednim tydźenju septembra w Malešecach.
Großröhrsdorf: Mordarstwo na swětłym dnju
W Großröhrsdorfje dóńdźe srjedu popołdnju k mordarstwu. Wo tym informuje policija. Na Johanna-Sebastiana-Bachowej droze wuhlada swědk ćežko zranjenu 16-lětnu holcu blisko garažoweho kompleksa a je na to policiju alarmował. W chorowni je holca potom zemrěła. Zastojnicy pytaja tuchwilu hišće za njeznatym mužom, kiž je 16-lětnu po wšěm zdaću morił.
