Powěsće: srjedu, 15.09.2021
Hauptinhalt
16. požnjenca 2021, 10:16 hodź.
Podstupim: Zjawne posedźenje Rady za serbske naležnosće Braniborskeje
We Witaj-šulach a w kubłanišćach ze serbskej Witaj-wučbu su w Delnjej Łužicy najlěpje koronowy čas přetrali. Wo tym je wutoru na posedźenju Braniborskeje serbskeje rady zastupjer statneho šulskeho zarjada informował. Deficity naliči w šulach, w kotrychž so serbšćina jako cuza rěč poskićuje. Tam je mnoho staršich dźěći wot serbšćiny wotzjewiło. Cyłkownje wobdźěli so w Delnjej Łužicy 1.600 šulerjow a šulerkow na serbskej wučbje - je to 60 mjenje hač w zašłym šulskim lěće.
Hamor: Twarske dźěła w šuli
Energetiske saněrowanje zakładneje šule w Hamorje derje pokročuje. Kaž zdźěli wjesnjanosta Achim Junker na posedźenju gmejnskeje rady, móžachu do spočatka noweho šulskeho lěta dźěła w prěnim a druhim poschodźe zakónčić. Tuchwilu dźěłaja twarske firmy w přizemju a pincy. Po ponowjenju tamnišich rjadowniskich rumnosćow su w nazymskich prózdninach hišće běrowy na rjedźe.
Choćebuz: Wo krajinach po brunicy
Na Braniborskej techniskej uniwersiće w Choćebuzu zahaji so srjedu zhromadna konferenca uniwersity a Serbskeho instituta. Na třidnjowskim zetkanju zaběraja so zastupjerki a zastupjerjo wědomosće, zjawnych institucijow a hospodarstwa ze wšelakimi perspektiwami na krajiny po wudobywanju brunicy. Nimo stawizniskich aspektow a nazhonjenjow z přetworjenjom krajiny póndźe mjez druhim tež wo škit mjeńšinow.
Wojerecy: Pytaja namjety za mytowanje
Město Wojerecy pyta namjety za počesćowanje čestnohamtskich z čestnej jehłu Güntera Petersa. Kóždej dwě lěće město tute wuznamjenjenje spožči. Wobydlerki a wobydlerjo, zwjazki a towarstwa su namołwjeni, hač do 1. oktobra namjety w měšćanskim zarjedźe zapodać. Lětuše mytowanje budźe spočatk decembra na mjezynarodnym dnju čestnohamtskeho dźěła.
Wuměłstwo: Filmowa přehladka
Za lětušu 19. Łužisku filmowu přehladku w Choćebuzu móža zajimcy wot nětka swoje twórby zapodać. Tež lětsa spoči Załožba za serbski lud wosebite myto za serbski krótkofilm. Hač do 3. oktobra móža wuměłcy a wuměłče swóje twórby na internetowej stronje Choćebuskeho filmoweho festiwala zapodać.
