Powěsće: pjatk, 17.09.2021
Hauptinhalt
17. požnjenca 2021, 10:04 hodź.
Budyšin: Schadźowanka zaso w Krónje
Lětuša 147. Schadźowanka wotměje so zaso w Budyskej měšćanskej hali "Króna". Kaž zdźěli Jana Pětrowa wot Załožby za serbski lud, so zamołwići póndźelu prěni króć zetkaja, zo bychu lětuše zarjadowanje planowali. Režiju změjetaj znowa Katka Pöpelec a Syman Hejduška. Loni je so digitalna Schadźowanka wotměła a bu ze Serbskeho domu w Budyšinje wusyłana.
Chrósćicy: Šulu dale digitalizuja
Digitalny wutwar Chróšćanskeje zakładneje šule běše štwórtk wječor tema na tamnišej gmejnskej radźe. Z nowym šulskim lětom wužiwaja w rjadownjach hižo digitalne tafle. Hižo do toho instalowaše gmejna po cyłym twarjenju WLANowu syć. Štwórtk su so gmejnscy radźićeljo nětko na nakup notebookow za wučerjow šule dojednali. W dalšim dypku rozprawješe wjesnjanosta Marko Kliman, zo chcedźa w oktobru dźěl puća mjez Nuknicu a Lejnom wobnowić. Saněrowanje něhdźe 500 metrow dołheho wotrězka płaći něhdźe 43.000 eurow.
Pančicy-Kukow: Twarske dźěła dróše
Twarske dźěła w Pančansko-Kukowskej šuli su w zastatku a dróše hač planowane. Wo tym je tamniši wjesnjanosta Markus Kreuz gmejnskich radźićelow štwórtk na wuradźowanju gremija we Wotrowje informował. Jako hłownu přičinu za stupace kóšty mjenowaše Kreuz předpisy pomnikoškita. Přepodali su twarski nadawk za metalotwarske dźěła za wobłoženja w kubłanišću za nimale 60.000 eurow firmje z Kinsporka. Dokónčene su porno tomu pućotwarske dźěła w Kanecach. Tam wukonja firma Strabag tele dny zakónčace dźěła na ponowjenu dźěla puća po wsy.
Worklecy: Wšitke hrajkanišća poćerpjeli
Organizacija TÜV je zwěsćiła při kóždolětnym přepruwowanju zjawnych hrajkanišćow gmejny Worklecy wobšěrne škody. Dla dołho trajaceje włóžnoty w nalěću su na wšitkich hrajkanišćach gmejny drjewowe fundamenty nastrojow ćerpjeli a hižo žadanjam wěstoty njewotpowěduja. Gmejna ma nětko wutworić priority a lisćinu, po kotrejž maja so hrajkanišća zaso zawěsćić. Za hrajkanišćo pěstowarnje předleži poskitk firmy, kotraž je wulki dźěl gmejnskich hrajkanišćow wuhotowała. Gmejnje pak njemóže tuchwilu trěbne 17.000 eurow zwjesć. Nětko chce so wo spěchowanske pjenjezy prócować.
Hórki: Jěchanski turněr z 200 konjemi
Na 170 jěcharjow z wjacorych zwjazkowych krajow wubědźuje so wot jutřišeho na jěchanišću w Hórkach. Nimo wjacorych serbskich a sakskich sportowcow, přijědu woni z dohromady 200 konjemi z Durinskeje, Bayerskeje, Braniborskeje a Berlina. Nimo pruwowanjow w dresurje a skakanju přewjedźe Pančanske konjace sportowe towarstwo znowa Sakske mišterstwa w mnohostronskim jěchanju. Wot lokalnych matadorow prócujetaj so Jakub Bobka z Worklec a Křesćan Zahrodnik z Chrósćic wo titul sakskeho mištra.
