Powěsće: sobotu, 18.09.2021
Hauptinhalt
19. požnjenca 2021, 20:38 hodź.
Wojerecy: Nětko ze županku a županom
Na čole Wojerowskeje Domowinskeje župy "Handrij Zejler" stejitaj wotnětka Gabriela Linakowa a Marcel Braumann. Je to k prěnjemu razej w stawiznach Domowiny, zo sej wosobje županstwo dźělitej. Delegaća jeju wčera na hłownej a wólbnej zhromadźiznje župy we Wojerecach jednohłósnje wolichu. Za městožupanku wuzwolichu Lubinu Dučmanowu. Nimo toho přistupi na zhromadźiznje towarstwo "Zahrodka 1921" z Delnjeho Wujězda k župje.
Budyšin: Nowy skład za muzej
Na Lubijskej dróze bu wčera nowy centralny skład wokrjesa Budyšin wotewrjeny. Serbski muzej a Muzej zapadneje Łužicy sej jón za swoje muzejowe zběrki dźělitej. Na 2.000 kwadratnych metrach maja tam nětko kmane techniske, klimatiske a wuhotowanske wuměnjenja za dołhodobne zdźerženje eksponatow. 1,2 milionaj eurow drohi přetwar něhdyšeho industrijoweho twara stej wokrjes Budyšin a Kulturny rum Hornja Łužica - Delnja Šleska zhromadnje zapłaćiłoj.
Budyšin: Swjatočne rozžohnowanje
Serbske šulske towarstwo je wčera na žurli Serbskeho doma swoju dołholětnu předsydku Ludmilu Budarjowu swjatočnje rozžohnowało. Rěčnicy - mjez nimi nawoda Budyskeje wotnožki krajneho zarjada za kubłanje, Mathias Peter - dźakowachu so jej za dołholětny angažement za kubłanje a spěchowanje serbskeje rěče. Dźěći z kubłanišćow z Ralbic, Malešec, Chrósćic a Wotrowa program wobrubichu. Ludmila Budarjowa je wot lěta 1991 na 30 lět dołho Serbske šulske towarstwo nawjedowała.
Łužica: Młodostni na wopyće
Na seminarje MENS, Młodźiny europskich narodnych skupin, a Serbskeho młodźinskeho towarstwa Pawk witachu wčera sydom wobdźělnikow, mjez nimi tež młodostnych danskeje mjeńšiny w Němskej a Saterfrizow. Hač do njedźele diskutuja młodostni wo diskriminaciji a rasizmje přećiwo awtochtonym narodnym mjeńšinam. Dźensa wobdźěla so na PowerSerbje w Radworju, jutře dojědu sej do Delnjeje Łužicy a Błótow.
Budyšin: Marju Grólmusec počesćili
Něhdźe połsta wopytowarjow je wčera w Serbskim muzeju Budyšin na zarjadowanju k česći dr.Marje Grólmusec było. Składnostnje jeje 125. posmjertnych narodnin su na jeje žiwjenje dopominali, a Walburga Wałdźic je z jeje listow recitowała a k tomu spěwała. W podijowej diskusiji po tym pjeć žonow wo swójskich nazhonjenjach ze zamołwitosću rozprawješe, mjez nimi wobswětowa škitarka Edith Pjeńkowa a studijowa nawodnica Bogna Korjeńkowa.
Chrósćicy: Nazymski kurs wušiwanja
Za nazymski kurs wušiwanja w Chrósćicach je so wosom wosobow přizjewiło. Z tym je kurs wuknihowany, tak Rejzka Krygarjowa, projektna managerka za Hornju Łužicu pola Domowiny. Wčera a dźensa wušiwaja w gmejnskim zarjedźe křižerske sekle. To je druhi kurs lětsa, po tym zo bě nalětni runje tak požadany. Nětko je předwidźane, zo so lětnje tajki kurs poskićuje.
