Powěsće: wutoru, 21.09.2021
Hauptinhalt
21. požnjenca 2021, 09:11 hodź.
Berlin: Mjeńšinowa rada so schadźowała
Mjeńšinowa rada Němskeje je so póndźelu w Berlinje na swoje lětuše štwórte posedźenje zetkała. Kaž zdźěli předsyda Domowiny Dawid Statnik, su čłonojo mjez druhim wuhódnoćili wotmołwy stronow na prašenja w zwisku z wólbami do Zwjazkoweho sejma. Wot šěsć naprašowanych stronow jeničce AfD wotmołwiła njeje. Dale je so rada zaběrała z aktualnej situaciju w Berlinje, hdźež młodźinski zarjad přisłušnosć k mjeńšinje Sinti a Romow registruje. Dla zakonsce zaručeneho swobodneho wuznaća k mjeńšinam to pak dowolene njeje.
Hornja Łužica: Protyka so na wsach předawa
Tež lětsa zaso roznošowarjo Ludoweho nakładnistwa Domowina na wsach Serbsku Protyku předawaja. Wot tutoho tydźenja so wona roznošowarjam dodawa. Spočatnje změja ju w Minakale a Radworju sobu, w přichodnych tydźenjach tež w dalšich wsach. Serbska Protyka 2022 je zašły tydźeń wušła, přichodnu póndźelu změje knižnu premjeru. Lětsa steji Minakał w srjedźišću.
Bukecy: Ponowjenje pišćelow zahajene
W Bukecach je wosada kónc tydźenja ponowjenje pišćelow cyrkwje zahajiła. 1890 natwarjene byrgle so dospołnje saněruja, při tym so wone tež zaso do originalneho stawa přetwarja. Dźěła je přewzała firma Groß z Wadec. Ponowjenje ma znajmjeńša lěto trać a płaći wjace hač štwórć miliona eurow. Wosada dóstanje za to spěchowanje wot krajneje cyrkwje, zběra pak tež dale pjenjezy.
Budyšin: Produkcija ansambla pućuje
Rejowanski kruch Serbskeho ludoweho ansambla "Za Marju – wosrjedź nocy" je za wustup zwonka Łužicy w rjedźe TANZLAND Kulturneje załožby Zwjazka nominowany. Produkcija na česć Marje Grólmusec z baletom, orchestrom a chórom ansambla měješe před lětomaj prapremjeru. Kónc oktobra předstaji so wona jako spěchowany wustup w badensko-württembergskim Vöhringenje. Spočatk oktobra je "Za Marju" tež hižo w Budyšinje a w Choćebuzu widźeć.
Budyski wokrjes: Incidenca nad 35
Koronowa incidenca w Budyskim wokrjesu bě póndźelu po dołhim času zaso nad 35. Jeli ličba hač do pjatka nad tutej marku wostanje, płaća wot njedźele krućiše škitne naprawy. Tak dyrbja wopytowarjo hosćencow a zarjadowanjow nutřka dopokazać, zo su šćěpjeni, negatiwnje testowani abo wot korony wustrowjeni. Dyrbja tež kontaktne daty podać. Po ličbach RKI leži incidenca za Budyski wokrjes aktualnje pola 37,2, w Zhorjelskim pola 20.
