Powěsće: póndźelu, 10.01.2022
Hauptinhalt
10. wulkeho róžka 2022, 10:02 hodź.
Budyšin: Wuhlady NSLDź
Budyske Němsko-serbske ludowe dźiwadło chce swój publikum tež lětsa z hornjo - a delnjoserbskimi inscenacijemi zawjeselić. Kaž nam zamołwita za serbski marketing Ana Měrćinowa praji přihotuja tuchwilu za februar planowanu prapremjeru "Šěrcec Hanka". W Delnjej Łužicy chcedźa w měrcu z inscenaciju "Jaja z kraja" a w meji z marionetowej hru "Mały Nykus" premjeru swjećić. Nimo toho próbuje serbske dźěćace dźiwadło pilnje za swoju premjeru "Małe wampiry". Na sobotnišej šćěpjenskej akciji iniciatiwy "Budyšin w zhromadnosći" w Budyskim dźiwadle je so 337 ludźi šćěpić dało.
Wuhlad Bukecy
Bukečanska gmejna planuje lětsa spočatk julija swjedźenski kónc tydźenja składnostnje 800-lětneho jubileja wsy. Do přihotow su towarstwa, šula a wosada zapřijate, tak wjesnjanosta Norbert Wolf. Dokelž lětsa wjacore wsy a města we wokolinje 800. róčnicu prěnjeho naspomnjenja swjeća, chce so gmejna tež na zhromadnych zarjadowanjach w Kumwałdźe a Wjelećinje wobdźělić. Serbja w Bukecach chcedźa k jubilejej drastowu skupinu wožiwić a ewangelsku serbsku drastu regiona pokazać.
Berlin: Předewzaća mjeńšinoweho sekretariata w stolicy
Lětsa wotewri so pućowaca wustajeńca „Was heißt hier Minderheit?“ w Zwjazkowym sejmje w Berlinje. To je jedyn z wulkich projektow mjeńšinoweho sekretariata ze sydłom w stolicy, praji nawoda Gösta Nissen wot friziskeje mjeńšiny. Nimo toho zasadźuja so za zakótwjenje mjeńšinowych prawow do zakładneho zakonja a za to, zo so wěda wo mjeńšinach po cyłej Němskej w šulach sposrědkuje.
Budyšin: Lěto serbskeje dekanatneje młodźiny zahajene
Lěto serbskeje dekanatneje młodźiny je so sobotu z kubłanskim dnjom za młodych dorosćenych w Budyšinje zahajiło. K prěnjemu razej wotmě so tutón w ewangelskim centrumje za dźěći a młodźinu "TiK" (Treff im Keller). Dohromady 16 młodych dorosćenych mjez 18 a 27 lětami zaběraše so z temu "žedźba". W rozdźělnych skupinkach zhotowichu na přikład tematiske plakaty a sćěhowachu přednoškej referentki Natalije Bienkowskej k teologiji ćěła.
Hora: Wčera kołojězba oldtimerow
Něhdźe połsta oldtimerow, starych traktorow, motorskich a nakładnych awtow je so wčera na kołojězbje wot Hory přez Njeswačidło, Baćon a Haslow wobdźěliło. Lubowarjo historiskich jězdźidłow přichadźachu ze Zhorjelca, Cunnersdorfa a Stróže pola Hućiny runje tak kaž ze serbskich wsow. Po tym, zo je tradicionalne zymske zetkanje hižo dwójce wupadnyć dyrbjało nadźijeja so na přichodne zetkanje w awgusće w Koblicach.
Němske Pazlicy: Wuslědk wotběhanja hodowneje husycy
Nimale 700 wobdźělnikow, mjez nimi tójšto serbskich běharkow a běharjow, je so mjez hodami a nowym lětom na "21. wotběhanju hodowneje husycy" w Němskich Pazlicach wobdźěliło. Tamniše sportowe towarstwo zliči rekordnu ličbu 675 přizjewjenych dźěći, młodostnych a dorosćenych, kiž zapisachu do lisćinow (w interneće) přez 6000 (6040km) kilometrow. Sportowa akcija bjez wubědźowanskeho charaktera dyrbješe so lětsa druhi raz indiwiduelnje přewjesć.
