Powěsće: wutoru, 11.01.2022
Hauptinhalt
11. wulkeho róžka 2022, 11:15 hodź.
Wobsah artikla:
Hornja Łužica: Demonstracije přećiwo koronowej politice
Na póndźelnišich demonstracijach přećiwo koronowym postajenjam je so w Hornjej Łužicy po ličenju policije dohromady 6.500 ludźi wobdźěliło. W Budyšinje bě jich něhdźe 800, w Kamjencu 440 a we Wojerecach 300. Kaž policija zdźěli, bě w Budyšinje mjez demonstrantami na 200 ludźi z prawicarskeho spektruma. Někotři z tutych su policiju namócnje nadběhowali, při tym buchu třo zastojnicy zranjeni a štyri awta policije wobškodźene.
Budyšin: Dźiwadło bórze zaso hraje
Němsko-Serbske ludowe dźiwadło w Budyšinje sobotu po dwěmaj měsacomaj zaso swoje durje wopytowarjam wotewri. Wot 21. nowembra bě wone dyrbjało po wukazu kraja a wokrjesa wšitke předstajenja wotprajić. Na planje přichodneho kónca tydźenja steja tři komedije w němskej rěči. Přichodne serbske předstajenje je srjedź februara premjera "Šěrcec Hanka". Konkretne wuměnjenja za wopyt dźiwadła so hakle srjedu aktualizuja.
Budyski wokrjes: Alkohol w zjawnosći zakazany
Wot wčerawšeje póndźele je w Budyskim wokrjesu konsum alkoholiskich napojow w zjawnosći zakazany. Kaž zdźěli krajnoradny zarjad, je to wobstatk noweho wukaza za škit přećiwo koronje w Sakskej. Nastupa to předewšěm městnosće kaž pěškowe cony, před gastronomiju, na zastanišćach a dwórnišćach kaž tež na sportnišćach a w parkach.
Kubšicy: Plany gmejny w lěće 2022
Kubšiska gmejna chce lětsa wulki projekt přetwara zakładneje šule w Bošecach zakónčić. Kaž wjesnjanosta Olaf Reichert zdźěli, ma šula w lěćnych prózdninach zaso do twarjenja zaćahnyć. Šula swjeći lětsa tež 125-lětne wobstaće. Nimo toho chce Kubšiska gmejna lětsa Albrechtowku w Krakecach tak přetwarić, zo při wulkej wodźe woda lěpje wotběži. A Poršicy přihotuja so na swjedźeń składnostnje 800-lětneje róčnicy prěnjeho naspomnjenja.
Hornja Łužica: Poskitk šćěpjenja za dźěći a młodostnych
Wot pjatka, 14. januara, móža so w Budyskej chorowni dźěći w starobje wot pjeć lět kaž tež młodostni přećiwo koronje šćěpić dać. Přizjewjenje za to je wot wčerawšeje póndźele móžne a trěbne. Šćěpić měli so po wuprajenju kliniki wosebje dźěći a młodostni z chroniskimi chorosćemi, poskitk měri so pak tež na wšitkich druhich.
Wětrow: Zwottorhaja dalšu chěžu
We Wětrowje so bórze dalše twarjenje z 18 bydlenjemi zwottorha. To zdźěli wjesnjanosta Stani Ryćer. Zwottorhanje bě so dliło, dokelž běštej sej dwě swójbje swojej bydleni před lětami kupiłoj. Tuž dyrbješe jimaj gmejna najprjedy alternatiwu wobstarać. Spočatk 1960tych lět nasta we Wětrowje paralelnje k modernej šamotowni dwanaće wulkich bydlenskich domow. Mjeztym pak je wjele ludźi Wětrow zaso wopušćiło, tak zo dyrbješe gmejna dotal hižo tři prózdne bloki zwottorhać.
Slepo: Domizniske towarstwo bilancuje
Domizniske towarstwo w Slepom je dyrbjało loni a 2020 wjace hač połojcu wšitkich planowanych zarjadowanjow wotprajić. Předsyda Roland Richter mjenuje to dramatiske wuwiće a nadźija so, zo lětsa hižo telko zarjadowanjow njewupadnje. Wšako swjeći Slepo lětsa swoju 750. róčnicu prěnjeho naspomnjenja. Na tym chce so towarstwo wobdźělić. Nimo toho chcedźa čłonojo swój towarstwowy dom lětsa dale porjeńšić.
