Powěsće: štwórtk, 13.01.2022
Hauptinhalt
13. wulkeho róžka 2022, 11:53 hodź.
Korona: Nowe postajenja
Srjedu je Sakska wšelake wolóženja koronowych postajenjow wobzamknyła. Tak smědźa so wot pjatka zarjadnišća kultury, kaž na přikład muzeje, wustajeńcy, dźiwadła, kina a hosćency pod wuměnjenjemi 2G-plus wopytać. Trójce šćěpjeni aktualny test njetrjebaja. Za ćěłobliske posłužby, kaž na přikład kosmetiske salony, płaća postajenja 2G - potajkim bjez aktualneho testa. Tež ličba maksimalnje wobdźělenych wosobow na zhromadźiznach so zaso zwyši.
Domowina: Z posedźenja prezidija
Na digitalnym posedźenju prezidija Domowiny srjedu je nowa jednaćelka Judit Šołćina mjez druhim wo aktualnym dźěle Serbow w Mjeńšinowej radźe Němskeje informowała. Zwjazkowe předsydstwo ma zaso třoch zastupjerjow delegować. Při wuhódnoćenju koaliciskeho zrěčenja na zwjazkowej runinje chwaleše prezidij, zo su Serbja wuraznje jako „serbski lud” připóznaći. Na europskej runinje hlada Domowinje w dźěłowych skupinach FUEN w přichodźe hišće dale a wjac dźěła do rukow, tohodla maja přistajeni zarjada po potrjebje a temje kaž dalši zamołwići serbskeho towaršnostneho žiwjenja zapřijeći być.
Slepo: Z gmejnskeje rady
Gmejna Slepo chce w procesu strukturneje změny bóle zapřijata być. W lisće na zwjazkoweho zamołwiteho za wuchodnu Němsku, Carstena Schneidera, prosy gmejna wo wopyt zapósłanca w regionje. Tak by sej Schneider móhł swójski wobraz stworić wo hórnistwje w regionje. Kaž zdźěli wjesnjanosta Jörg Funda na zašłym posedźenju tamnišeje gmejnskeje rady, dźěła tuchwilu na 40 procentow wobydlerstwa komuny w hórnistwje.
Zhorjelc: Łužiska filmowa akademija znowa budźe
Lětsa je druhe koło tak mjenowaneje "Łužiskeje filmoweje akademije" planowane. Dwutydźenske zarjadowanje ma so wot spočatk do srjedź julija w Zhorjelcu přewjesć. Tuchwilu pytaja zamołwići za dobrowólnymi, kiž chcedźa team organizatorisce přewodźeć. Lětsa matej so dwě skupinje za wobdźělnikow wutworić - jedna za započatkarjow a jedna za profesionelnych filmowcow. Projekt podpěruje so mjez druhim přez syć "Łužyca-film".
Kamjenc: Lessingowa biblioteka z nowym digitalnym poskitkom
Na stronje Kamjenskeje měšćanskeje biblioteki poskića so wot nětka 3.500 widejow. Tute wobsahuja tež dźěćace filmy w 35 rubrikach. Wšitke poskitki su stajnje k dispoziciji, zwjetša w HD-kwaliće a bjez wabjenja a časoweho wobmjezowanja. Přistup k portalej z mjenom ,,filmfriend" je za mějićelow wupokaza biblioteki móžny.
