Powěsće: pjatk, 14.01.2022
Hauptinhalt
14. wulkeho róžka 2022, 15:36 hodź.
Drježdźany: Rozmołwa Domowiny z ministerku
Domowina a sakska ministerka za kulturu Barbara Klepschowa stej sej přezjednej, zo měła Serbska rada Sakskeje hižo w tuchwilnej legislaturnej periodźe swójsku jednaćelnju dóstać. To zdźělištej ministerstwo a třěšny zwjazk po dźěłowej rozmołwje předsydy Domowiny, Dawida Statnika, a jednaćelki Judit Šołćineje z ministerku. Přezjednej běštej sej Domowina a ministerka tež, zo dyrbja turistisce wažne kolesowarske puće runohódnje němsce a serbsce z taflemi markěrowane być. Konkretne přesadźenje w jednotliwych padach ma so hišće rjadować.
SLA: Ptači kwas budźe
Serbski ludowy ansambl předstaji přichodny kónc tydźenja swój ptačokwasny program "Njewěsta njewjesta" w Chróšćanskej Jednoće. Kaž praji nowinski rěčnik Stefan Cuška, je za 21. januara wječorna premjera planowana. Dalšej předstajeni budźetej sobotu a njedźelu popołdnju. Je to program, kotryž bě SLA hižo loni předstajić chcył. Režiju ma Tomaš Cyž, kiž je zdobom libreto napisał. Ansambl změje w Chrósćicach mobilny testowanski centrum, dokelž płaća za zarjadowanja wuměnjenja 2G-plus.
Budyšin: Lětuše předewzaća Serbskeho muzeja
Serbski muzej w Budyšinje planuje tež lětsa rjad wustajeńcow. Wuzběhnyć chce nawodnica muzeja Christina Boguszowa mjez druhim wustajeńcu wo nahłownej pyše słowakskeje narodneje drasty w 21. lětstotku: "To budźe zajimawa wustajeńca. A wulki jubilej na nas čaka: 100. narodniny serbskeho molerja Jana Buka. To budźe tež wulki projekt, kiž hromadźe zrealizujemy z muzejemi we Łužicy kaž tež we Wrocławju a w Zielonej Górje."
Běła Woda: Nowy zwjazk za pitnu wodu
Šěsć zastaraćelow pitneje wody ze Sakskeje a Braniborskeje je "Zwjazk pitneje wody Łužiski rewěr" załožiło. Kaž dźěłowe zjednoćenstwo zdźěli, je hłowny zaměr, zhromadnje zestajeny koncept za pitnu wodu w regionje přesadźić. Po kóncu wudobywanja brunicy wšak njemóže wodarnja w Čornej Pumpje hižo žanu wodu dodawać. Nimo EWAG z Kamjenca wobdźěla so na projekće měšćanske zawody Běłeje Wody a Wojerec kaž tež zaměrowy zwjazk Srjedźna Nysa-Šepc.
Budyšin: Bilanca wuchowanskeho helikoptera
W Budyšinje stacioněrowany wuchowanski helikopter Christoph 62 bě loni na wjace hač 1.400 zasadźenjach po puću. To zdźěli wuchowanska słužba DRF. Bě to něhdźe 950 nuzowych zasadźenjow, nimo toho hišće někak 500 lětow za transportowanje pacientow. Wot lońšeho nowembra maja w Budyšinje dalši helikopter, zo bychu nuzowe zasadźenja stajnje zaručić móhli. Helikoptery DRF buchu loni po cyłej Sakskej nimale 3.000 króć alarmowane.
Wojerecy: Zwyšeny zastup
Łužiska kupjel we Wojerecach startuje ze zwyšenym popłatkom do noweho lěta. Kaž Lausitzer Rundschau pisa, bu zastupny pjenjez wo nimale pjeć procentow zwyšeny. Přičina su stupace wudawki za personal a wyše płaćizny za material a rjemjeslniske posłužby. Wot lońšeho nowembra bě Łužiska kupjel koronowych postajenjow dla zawrjena a so na dźensnišim pjatku zaso wotewri.
