Powěsće: sobotu, 15.01.2022

17. wulkeho róžka 2022, 10:31 hodź.


Budyšin: Dalše kroki za wulki projekt

Hač budźe Załožba za serbski lud sama twarski nošer za wulki projekt wědomostneho centruma při Lawskich hrjebjach, hišće jasne njeje. Kaž Załožba zdźěli, přihotuje wona tuchwilu planowanske dźěła a wotpowědne wobzamknjenja w swojich gremijach. Loni srjedź decembra bu zrěčenje za nakup Lawskeho areala podpisane. Cyłkownu sumu 83.000 eurow je Załožba kónc lěta tež hnydom přepokazała. Nětko dyrbi so změna wobsedźerja hišce do ležownostneje knihi zapisać.


Wopłóčkowy zwjazk: Popłatki wostanu

W gmejnach zaměroweho zwjazka za wopłóčki Při Klóšterskej wodźe so z přistupom k zaměrowemu zwjazkej za pitnu wodu Kamjenc popłatki za wopłóčki njezměnja. To zdźěli předsyda zawoda ewag Kamjenc, Torsten Pfuhl. Zawod wobhospodaruje wotstronjenje wopłóčkow za Kamjenski region a by personal a rjedźensku připrawu we Wudworje při přistupje přewzał. Tež w přichodźe maja so popłatki za gmejny Pančicy-Kukow, Chrósćicy, Worklecy, Ralbicy-Róžant a Porchow separatnje wobličić. W decembru je čłonska zhromadźizna zaměroweho zwjazka za wopłóčki Při Klóšterskej wodźe rozsudźiła, zo Kamjenski zwjazk wo přistup prosy.


Nuknica: Dźensa digitalna Jolka

Nukničanski wjesny klub přeprošuje dźensa na digitalny Jolka-swjedźeń. Program započnje so wječor sedmich, wot šesćich je wirtuelna hala přistupna. Kaž organizatorojo zdźěla, su wjace hač 150 pakćikow jědźe předali. Tute móža sej ludźo dźensa pola pjekarjow wotewzać, hdźež su lisćiki za to kupili. Kooperaciski partner Jolki je tež lětsa Załožba za serbski lud, kotraž stara so wo to, zo so program digitalnje přenjese.


Cyrkej: Wobmjezowanja za pohrjeby

Katolski běrow Sakskeje kritizuje, zo je w nowym koronowym postajenju sakskeho knježerstwa ličba ludźi při pohrjebach dale na 20 wobmjezowana. Katolska cyrkej wupraji so za to, zo měło wobmjezowanje jenož za zetkanja po pohrjebje płaćić a nic za pohrjeb samy. Wšako trjebaja žarowacy pomoc a tróšt, štož njeměło so njetrjebawšo wobmjezować. Dotalne stejišća cyrkwje w tutym zwisku knježerstwo wobkedźbowało njeje, tak Katolski běrow.


Budyšin: Weißer Ring bilanca

Towarstwo WEISSER RING, kiž stara so wo wopory namocy, je tež loni stupacu ličbu naprašowanjow zwěsćiło. Kaž rjekny Lucia Großowa wot towarstwa, je w Budyskim wokrjesu 18 potrjechenych wo pomoc prosyło. Při tym njejsu telefoniske poradźowanja wobkedźbowane. Wosebje w času po lockdownach je potrjeba stupała. Tak kopichu so přewažnje wumocowanje dźěći a namóc doma. Zo by móhło towarstwo wosebje swoju pomoc na kraju rozšěrić, pytaja dale za čestnohamtskimi pomocnikami.