Powěsće: srjedu, 22.06.2022
Hauptinhalt
Powěsće: srjedu, 22.06.2022
22. smažnika 2022, 09:52 hodź.
Łužica: Sakska a Braniborska zhromadnje za strukturnu změnu
Sakska a Braniborska chcetej při strukturnej změnje we Łužicy dale wusko hromadźe dźěłać. W srjedźišću steja při tym hranicy krajow přesahowaca infrastruktura a stworjenje nowych industrijowych dźěłowych městnow. To zdźělištej knježerstwje wutoru po zhromadnym posedźenju w Braniborskej. W zašłymaj lětomaj su we woběmaj krajomaj hižo wjele za přichod docpěli, bilancowaštaj ministerskej prezidentaj Kretschmer a Woidke. Žadaštej sej pak wyši tempo a wjace fleksibelnosće při přesadźenju projektow kaž tež aktiwnišu rólu Zwjazka. Předsyda Domowiny Dawid Statnik je na posedźenju předstajił plany Domowiny w zwisku ze strukturnej změnu. Zaměr je, zo na kóncu lětstotka zaso 100.000 ludźi we Łužicy serbsce rěči, tak Statnik.
Braniborska: Delnjoserbšćinu dale spěchować
Delnjoserbska rěč ma so w Braniborskej dale konsekwentnje spěchować a z tym zesylnić. Za to je braniborske knježerstwo wutoru schwaliło plan z 36 naprawami. Mjez druhim chce kulturne ministerstwo jenož hišće projekty z konkretnym rěčnym poćahom spěchować. Ministerstwo za kubłanje chce delnjoserbsku rěč w pěstowarnjach skrućić a při nawabjenju wučerjow a wučerkow bóle wobkedźbować. Nimo toho je planowane, serbske poskitki zarjadow w interneće dale wutwarić.
Sport: Testowa hra za Europeadu
Serbske mustwo je wutoru w Chrósćicach přećiwo Natwarej Němske Pazlicy z 1:3 přěhrało. Bě to jenička testowa hra do Europeady. W połčasu je so kompletne mustwo wuměniło. Jeničke wrota za Serbow je Dawid Šołta třělił. Pjatk wotjědźe potom bus do Korutanskeje, hdźež so sobotu Europeada oficialnje zahaji.
Njeswačidło: Z posedźenja gmejnskeje rady
Njeswačanska gmejnska rada je wutoru mjez druhim rozsudźiła, swojej zakładnej šuli nowe blida a stólcy kupić. Tute budu tež wyše hač dotalne, dokelž bywaja dźěći tuteje staroby po słowach wjesnjanosty Gerda Schustera pječa dźeń a wjetše. Nimo toho je rada wobzamknyła, domske w něhdyšim Njeswačanskim knježim dworje wobydlerjej z Małeho Wjelkowa předać. Wón chce dotal gmejnje słušace twarjenje na bydlenja přetwarić.
Hornja Łužica: Hudźbne lěćo MDR
W zašły kónc tydźenja zahajenym Hudźbnym lěću MDRa su lětsa tři koncerty w Hornjej Łužicy. Tutón tydźeń pjatk hižo zahudźi Sinfoniski orchester MDRa w Budyskej Tachantskej cyrkwi. Słyšeć budu tam pod hesłom "Wienska klasika" mjez druhim twórby Mozarta a Haydna. Dalšej koncertaj Hudźbneho lěća w regionje stej spočatk awgusta: Komornohudźbny wječor w Zhorjelskej synagoze a program z hudźbu a tekstami młodych awtorow w Energijowej fabrice w Hórnikecach.
