Powěsće: štwórtk, 23.06.2022
Hauptinhalt
23. smažnika 2022, 08:51 hodź.
Załožba: Nachwilne hospodarjenje zakónčene
Załožba za serbski lud je srjedu móhła nachwilne hospodarjenje zakónčić. Pozadk je, zo bu srjedu Zwjazkowy hospodarski plan wozjewjeny a z tym płaćiwy. Dla lońšich wólbow bě Zwjazkowy sejm lětuši hospodarski plan hakle spočatk junija wobzamknył. Załožba za serbski lud móžeše tohodla w zašłych měsacach jenož to spěchować, za čož wobsteji prawniska winowatosć - kaž spěchowanje institucijow a dale wjeducych projektow. Nimo w financnym zrěčenju zapisanych přiražkow za Załožbu płaći Zwjazk lětsa tež nimale 200.000 eurow za konkretne projekty digitalizacije.
Wotrow: Swjedźenski kónc tydźenja so zahaji
We Wotrowje zahaji so štwórtk ze swjatočnej Božu mšu swjedźenski kónc tydźenja składnostnje 250-lětneho wobstaća wosady. Planowane su w přichodnych dnjach přednoški, filmowe wječorki, sportowe wurisanja a kulturne programy, mjez druhim z chórom Lipa, Horjanami a ze skupinomaj Wusmuž a Holaski. Njedźelu prezentuja wosadni swjedźenski ćah, tež starobiskop Joachim Reinelt so njedźelu na Božej mši wobdźěli.
Bielefeld: SLA so na wikach prezentował
Wot njedźele do srjedy je so Serbski ludowy ansambl na dźiwadłowych wikach Inthega w Bielefeldźe prezentował. Kaž ansambl zdźěli, wužiwachu tam składnosć, z dźiwadłami, měščanskimi halemi a towarstwami, kiž hóstne předstajenja nakupuja, wuradźować. SLA skutkowaše na wikach zdobom jako pósłanc Serbow a Łužicy. Z wothłosom su ansamblowcy spokojom. Partnerojo ansambla na Inthega běchu z tukraja a němskorěčnych regionow Europy.
Zhorjelc: Přizjewjenja za filmowu akademiju Łužica
Za lětušu Lěćnu filmowu akademiju Łužica maja organizatorojo mjeztym hižo wjace hač 25 přizjewjenjow. Kaž praji jedyn z hłownych zamołwitych, filmowc Erik Schiesko, je hišće dźesać městnow swobodne. Tež ze susodneje Čěskeje a Pólskeje móža so zajimcy hišće přizjewić. Dwutydźenska Lěćna filmowa akademija Łužica přewjedźe so lětsa k druhemu razej a startuje 3. julija w Zhorjelcu.
Wojerecy: Z měšćanskeje rady
Město Wojerecy je wobstatk cyłoněmskeho modeloweho projekta "Zhromadnje na městnje přichod stworić". To zdźěli wyši měšćanosta Torsten Ruban-Zeh na zašłym posedźenju měšćanskeje rady. Při tutym projekće móža wobydlerjo swoje ideje za wuwiće města přinošować. Jako prěnje ma nastać kulturna pućowanska šćežka kołowokoło Wojerec. K spočatkej projekta dóstanje město 10.000 eurow podpěry.
